Elordada aerotaksı alǵash ret synaqtan ótti
ASTANA. KAZINFORM — Elordada alǵash ret elektr qýatymen jumys isteıtin aerotaksıdiń kórsetilimi ótti. Qala ishinde áýe tasymalyn damytýǵa baǵyttalǵan joba «Bolashaq oıyndary — 2026» halyqaralyq oıyndary aıasynda tanystyryldy.
Aerotaksıdiń ushý sáti qazaqstandyq Alatau Advance Air Group Ltd. (AAAG) kompanııasy Qytaıdyń AutoFlight kompanııasymen birlesip ótkizildi.
Kórsetilim barysynda AutoFlight Prosperity elektrli tik kóterilip, tik qona alatyn eVTOL áýe apparaty tanystyryldy. Aerotaksı bir ushqysh pen bes jolaýshyǵa arnalǵan. Keleshekte ushqyshsyz ushý jobasy da qarastyrylyp jatyr. Onyń eń joǵary jyldamdyǵy saǵatyna 200 shaqyrym, al bir qýatta shamamen 200 shaqyrymǵa deıin usha alady. Apparat 13 elektr qozǵaltqyshymen jabdyqtalǵan. Sonyń arqasynda kádimgi tikushaqtarǵa qaraǵanda dybysy áldeqaıda báseń, ári atmosferaǵa kómirqyshqyl gazyn shyǵarmaıdy.
Alǵashqy ashyq kórsetilim halyqaralyq qaýipsizdik talaptaryna sáıkes jolaýshylarsyz ótkizildi.
Alatau Advance Air Group Ltd. kompanııasynyń bas dırektory Sergeı Hegaıdyń aıtýynsha, bul tek bir rettik kórsetilim emes.
— Astanadaǵy ushý — Qazaqstanda qalalyq áýe mobıldigin damytý baǵytyndaǵy júıeli jumystyń bir bóligi. Bizdiń maqsatymyz — ınnovatsııalyq áýe kóligin elimizdiń kólik júıesiniń ajyramas bóligine aınaldyrý, — dedi Sergeı Hegaı.
Joba bıyl maýsym aıynda zańnamalyq qoldaýǵa ıe boldy. Memleket basshysy Qasym-Jomart Toqaev elektrli tik kóterilip, tik qona alatyn áýe apparattaryn (eVTOL), vertıporttardy jáne ushqyshsyz áýe qozǵalysyn basqarý júıesin quqyqtyq turǵydan retteıtin zańǵa qol qoıǵan bolatyn.
Eske sala keteıik, buǵan deıin, Qazaqstanda eVTOL áýe kóliginiń alǵashqy tanystyrylymy 2026 jylǵy 19 mamyrda Alataýdaǵy elimizdegi alǵashqy vertıporttyń aýmaǵynda ótken bolatyn.
Sondaı-aq aerotaksı qyzmeti bastapqy kezeńde Alataý jáne Almaty qalalarynda iske qosylady.
