Elordada «Ádilet» partııasynyń II Sezi bastaldy
ASTANA. KAZINFORM – Astanada «Ádilet» partııasynyń II Sezi óz jumysyn bastady. Sezd jumysyna partııa delegattary, qoǵamdyq jáne kásibı birlestikterdiń ókilderi qatysyp jatyr.
Іs-sharaǵa qurylys, densaýlyq saqtaý, bilim berý, kólik, telekommýnıkatsııa, týrızm, kásipkerlik, energetıka, tsıfrlyq tehnologııalar jáne munaı-servıs salasyn usynatyn iri salalyq birlestikterdiń, kásibı qaýymdastyqtardyń jáne sarapshylyq uıymdardyń jetekshileri qatysýda.
Partııa keńesiniń saıası múshesi Raýan Kenjehanuly olardyń partııa qataryna ótip, búginde onyń uıymdyq áleýetin nyǵaıtýǵa jáne baǵdarlamalyq maqsattaryn júzege asyrýǵa atsalysyp jatqanyn atap ótti.
— Sezd jumysyna «AMANAT» partııasynyń ókilderi de qatysyp otyr. Atalǵan partııanyń «Ádilet» partııasyna qosylýy máselesi sezd delegattarynyń qaraýyna shyǵaryldy. Sonymen qatar II Sezdiń kún tártibine partııanyń odan ári damýy, óńirlik fılıaldardy qurý jáne uıymdyq qurylymdy nyǵaıtý máseleleri engizildi, — dedi ol.
Sezd qarsańynda strategııalyq sessııa uıymdastyrylyp, delegattar partııanyń aldaǵy kezeńdegi basym baǵyttaryn talqylady.
Aıta keteıik, «Ádilet» partııasy túrli kásibı qaýymdastyqtar men qoǵamdyq birlestikter ókilderiniń bastamasymen quryldy.
2026 jylǵy 7 mamyrda Astanada «Ádilet» saıası partııasynyń quryltaı sezi ótip, partııanyń resmı qyzmeti bastaldy. Al 2026 jylǵy 1 maýsymda Qazaqstan Respýblıkasynyń zańnamasyna sáıkes Qazaqstan Respýblıkasy Ádilet mınıstrligi «Ádilet» saıası partııasyn memlekettik tirkeýden ótkizdi.
Partııa eńbek adamdarynyń, munaı-servıs jáne taý-ken metallýrgııasy salasy qyzmetkerleriniń, shahterlerdiń, sport, bilim berý, densaýlyq saqtaý, ǵylym, kásipkerlik, IT-sektor, quqyq salasy jáne kreatıvti ındýstrııa ókilderiniń basyn biriktiredi.
Partııa platformasynyń negizin ádilettilik, jaýapkershilik, teńdik, otansúıgishtik jáne progress qaǵıdattary quraıdy. Partııa zań ústemdigin nyǵaıtýdy, tıimdi memlekettik jáne qoǵamdyq ınstıtýttardy damytýdy, óńirlerdi qoldaýdy, adamı kapıtaldy jetildirýdi, tsıfrlandyrýdy ilgeriletýdi jáne básekege qabiletti ekonomıkany qalyptastyrýdy qoldaıdy.
«Ádilet» partııasynyń II Seziniń jumysy jalǵasyp jatyr.
Eske salsaq Astanada «AMANAT» partııasynyń kezekti Sezi ótti. Onyń qorytyndysy boıynsha partııa músheleri memleketti damytý baǵytynda atqarylǵan jumys nátıjesin qorytyndylap, «Ádilet» partııasyna qosylý ıdeıasyn qoldaǵan edi.
