Elordada ádebıet pen baspa isiniń úzdikteri marapattaldy
ASTANA. KAZINFORM — Astanadaǵy Prezıdenttik ortalyqta QR Mádenıet jáne aqparat mınıstrliginiń uıymdastyrýymen «Ulttyq kitap» respýblıkalyq baıqaýy jeńimpazdaryn marapattaý rásimi ótti. Іs-shara Memleket basshysy Qasym-Jomart Toqaevtyń bastamasymen bekitilgen Ulttyq kitap kúni aıasynda uıymdastyryldy. Bul týraly Mádenıet jáne aqparat mınıstrligi málim etti.
Saltanatty jıyn Qazaqstan Respýblıkasy Prezıdentiniń ishki saıasat máseleleri jáne kommýnıkatsııalar jónindegi kómekshisi Arman Qyryqbaevtyń quttyqtaý sózimen ashyldy.
— Memleket basshysy árdaıym qoǵamda kitap oqý mádenıetin damytýǵa erekshe mán beredi. 2024 jyly Ulttyq quryltaıdyń úshinshi otyrysynda Prezıdent «Kitap oqıtyn ult» tujyrymdamasyn usynǵan edi. Atalǵan tujyrymdama negizinde byltyrdan bastap 23 sáýir Ulttyq kitap kúni bolyp belgilendi, — dedi Arman Qyryqbaev.
Sondaı-aq, Prezıdent kómekshisi aldaǵy eki aptada Memleket basshysy kitap oqý mádenıetin keńinen nasıhattaýǵa jáne zııatker ult qalyptastyrýǵa baǵyttalǵan arnaıy jarlyqqa qol qoıatynyn jetkizdi. Іs-sharaǵa Parlament depýtattary, belgili aqyn-jazýshylar, memleket jáne qoǵam qaıratkerleri, sondaı-aq kitaphana basshylary qatysty.
«Ulttyq kitap» respýblıkalyq baıqaýy otandyq avtorlardy qoldaýǵa, baspa isin damytýǵa jáne qazaq ádebıetiniń, rýhanııatynyń damýyna baǵyttalǵan.
— Bıyl baıqaýǵa 32 baspadan 155 ótinim tústi. Qatysýshylar sońǵy eki jylda jaryq kórgen shyǵarmalaryn usyndy. Jeńimpazdar toǵyz nomınatsııa boıynsha anyqtaldy. Sonymen qatar «Jyl kitaby» atalymy boıynsha jeńimpaz esimi belgili boldy. Bul marapat Abaı Qunanbaıulynyń qara sózderi negizinde jazylǵan «Urpaqqa ulaǵat» kitaby úshin Gúlmıra Amandyqovaǵa tabystaldy, — delingen vedomstvonyń habarlamasynda.
Barlyq jeńimpazǵa aqshalaı syılyqtar berildi. Saltanatty rásim aıasynda elimizdiń túkpir-túkpirinen kelgen kitaphanashylar men baspa salasynyń ókilderi «Mádenıet salasynyń úzdigi» tósbelgisimen jáne «Qurmet» gramotasymen marapattaldy.
Aıta keteıik, buǵan deıin Oqý-aǵartý mınıstrliginde Ulttyq kitap kúni men Kitaphanashylar kúnine arnalǵan saltanatty is-shara ótti. Іs-shara aıasynda kitaphana mamandarynyń eńbegin baǵalaý, kitap oqýdy nasıhattaý jáne mamandyq mártebesin arttyrý máselelerine basymdyq berildi.