Elordada adamgershilik qundylyqtardy nyǵaıtýdyń 2015-2020 jyldarǵa arnalǵan jospary talqylandy

ASTANA. QazAqparat - Qazaqstan Respýblıkasynyń Memlekettik hatshysy Gúlshara Ábdiqalyqovanyń tóraǵalyǵymen Qazaqstan Respýblıkasynyń Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa otyrysy ótti, dep habarlaıdy Aqordanyń baspasóz qyzmeti.

Memlekettik hatshy Táýelsizdiktiń shırek ǵasyrlyq mereıtoıy «Birlik pen jasampazdyqtyń 25 jyly» uranymen merekelenip jatqanyn atap ótti.

- Jyl boıy biz Qazaqstannyń qalyptasý kezindegi qıyndyqtar týraly aıtyp, elimizdiń túrli saladaǵy jetistikterin kórsetip, osy jyldary qandaı jolmen birge júrip ótkenimizdi sarapqa saldyq, - dedi G.Ábdiqalyqova.

Otyrysta Qazaqstan Respýblıkasynda otbasylyq qatynastardy, moraldyq-etıkalyq jáne rýhanı-adamgershilik qundylyqtardy nyǵaıtýdyń 2015-2020 jyldarǵa arnalǵan jalpyulttyq is-sharalar josparynyń iske asyrylý barysy týraly máseleler qaraldy. Jospar aıasynda balalardyń, sonyń ishinde áleýmettik az qamtylǵan otbasylar balalarynyń jaǵdaıyn jaqsartýǵa, sondaı-aq otbasy jáne neke, otbasylyq qundylyqtardy nyǵaıtý turǵysynda halyqtyń biliktiligin arttyrýǵa baǵyttalǵan sharalar qarastyryldy.

Memleket basshysynyń tapsyrmasymen Balalar quqyqtary jónindegi ýákil ınstıtýty quryldy. Memlekettik bilim berýdegi jınaqtaý júıesi aıasynda balalar úıiniń 7 779 tárbıelenýshisi úshin 5 mlrd-tan astam teńge kóleminde jınaqtaý shottary ashyldy. Memleket otbasyǵa ornalastyrýdyń barlyq túrin (qamqorlyqqa alý, patronat, otbasyna qabyldaý) materıaldyq turǵydan qoldaıdy. Qazaqstan azamattary úshin bala asyrap alý rásimderi jeńildetilip, bala asyrap alýdyń halyqaralyq talaptary kúsheıtildi.

Mektepke deıingi 5 213 balasy bar 39 arnaýly mekeme jáne 5 461 bala tárbıelenetin 159 arnaýly toby bar jalpy mektepke deıingi mekeme jumys isteıdi. Búginde respýblıkada ınklıýzıvtik bilim berý ádisin engizgen balabaqshalar sany artýda. Mektepke deıingi jastaǵy 14 517 bala ınklıýzıvtik bilim berý júıesimen qamtylǵan. Qosymsha bilim berý mekemelerinde múmkindigi shekteýli 2 myńnan astam bala úshin shyǵarmashylyq saýyqtyrý sharalary uıymdastyrylǵan.

Sondaı-aq, otyrys barysynda áıelderdiń dinı saýattylyǵyn arttyrý isindegi aqparattyq-túsindirý jumysyna qatysty máseleler qarastyryldy. Aqparattyq-túsindirý jumystary aıasynda 2013-2016 jyldary 51%-dan astamyn áıelder quraıtyn, jalpy sany 5,5 mln-ǵa jýyq adamdy qamtyǵan 59 myńnan astam is-shara ótkizildi. Ulttyq komıssııa men óńirler ákimdikteri birlesip júrgizetin «Din jáne áıel» jobasy iske asyrylýda.

Budan bólek, Ulttyq komıssııa múshelerine jastar arasyndaǵy rýhanı-adamgershilik qundylyqtardy nasıhattap, ulttyq mádenıet pen otbasylyq dástúrlerdi ilgeriletý úshin qurylǵan «Otbasym.kz» ulttyq mýltımedııalyq portaly tanystyryldy.

Memlekettik hatshy otyrys sońynda memlekettik organdarǵa birqatar naqty tapsyrma berdi.