Elordada adam qaǵyp óltirgen kúdikti buryn eki ret sottalǵan
NUR-SULTAN. QazAqparat – Elordada taksı kóligin urlap, keıinnen eki jaıaý júrginshini qaǵyp ketken kúdikti osyǵan deıin eki ret isti bolǵan. Bul týraly Ortalyq kommýnıkatsııalar qyzmetindegi baspasóz máslıhatynda málim boldy, dep habarlaıdy QazAqparat tilshisi.
«Elordada tańǵy saǵat 06:52-de 102 kanalyna «Bızon» dámhanasynyń mańynda belgisiz bireý taksı júrgizýshisin uryp-soǵyp, avtokóligin aıdap ketkeni týraly málimet kelip tústi. Osydan keıin saǵat 06:58-de atalǵan avtokólik Táýelsizdik kóshesiniń boıynda joldan ótip bara jatqan eki jaıaý júrginshini qaǵyp ketkeni anyqtaldy. Bul oqıǵaǵa baılanysty polıtsııa kúshteri kóterilgen bolatyn. Oqıǵa ornyna jetken patrýldik polıtsııa jasaǵy 23 jastaǵy kúdiktini ustady», - dep naqtylady elordalyq polıtsııa departamentiniń bastyǵy Erjan Sadenov.
Belgili bolǵandaı, kúdikti ishimdikke sylqııa masaıǵan. Qazirgi kezde ol polıtsııa departamentiniń ýaqytsha ustaý ızolıatoryna qamaldy.
«Osy áreketterge baılanysty QR QK 345-baby («Adam ólimine ákep soqqan kólik quraldaryn paıdalaný qaǵıdalaryn buzýy») jáne avtokólik ıesine kúsh kórsetkeni úshin sotqa deıingi tergeý jumystary bastaldy», - dedi ol.
Budan buryn habarlanǵandaı, jol-kólik oqıǵasy saldarynan 48 jastaǵy áıel oqıǵa ornynda kóz jumdy. 2005 jyly týǵan jasóspirim túrli dene jaraqatymen aýrýhanaǵa jatqyzyldy.
Erjan Sadenovtiń sózine qaraǵanda, 23 jastaǵy kúdikti osyǵan deıin birneshe ret sotty bolǵan. 2013 jyly tonaý faktisi boıynsha, sodan keıin urlyq úshin is qozǵalǵan.
«Al endi 345-bap úshinshi tarmaǵy boıynsha 5 jylǵa deıin, sondaı-aq 200-bap aıasynda 10 jylǵa deıin bas bostandyǵynan aıyrý jazasy eskerilgen. Jalpy, onyń áreketterine qatysty sońǵy sheshimdi sot shyǵarady. Tergeý barysynda polıtsııa onyń kinásin dáleldep, jan-jaqty qaraıdy», - dedi elordalyq polıtsııa departamentiniń bastyǵy.
