Elordada «Abylaı hannyń armany» tarıhı dramasynyń premerasy ótedi
ASTANA. 4 jeltoqsan. QazAqparat - 12-13 jeltoqsanda Q.Qýanyshbaev atyndaǵy Memlekettik akademııalyq qazaq mýzykalyq drama teatrynda «Abylaı hannyń armany» atty tarıhı dramanyń premerasy ótedi. Bul týraly teatrdyń baspasóz qyzmetine silteme jasap astana.kz habarlady.
Qoıylym Táýelsizdik kúni qarsańynda Abylaı hannyń 300 jyldyǵyna oraı kórsetiledi.
Avtory - belgili jazýshy, jýrnalıst, zertteýshi, dramatýrg Dýman Ramazan, qoıýshy rejısseri - QR eńbek sińirgen qaıratkeri Bolat Uzaqov. Bul D.Ramazan men B.Uzaqov shyǵarmashylyǵyndaǵy ekinshi tarıhı týyndy bolmaq. Buǵan deıin 2010 jyly dramatýrg pen rejısser úndestiginde «Kenesary - Kúnimjan» atty tarıhı drama dúnıege kelip, búgingi tańǵa deıin kórermenniń súıikti qoıylymyna aınalǵan.
Abylaı hannyń rólinde «Qasym» fılminde Halyq qaharmany - Qasym Qaısenovty somdaǵan talantty akter Qýandyq Qystyqbaev pen «Kenesary-Kúnimjan» spektaklinde Kenesary beınesin somdaǵan, ónersúıer qaýym jyly qabyldaıtyn Syrym Qashqabaev oınaıdy.
