Elordada Abaıǵa úlken eskertkish ornatylady

NUR-SULTAN. QazAqparat – Elordada «Abaı álemi» ortalyǵy salynady. Bul týraly búgin Abaıdyń 175 jyldyq mereıtoıyn daıyndaý jáne ótkizý jónindegi memlekettik komıssııa otyrysynda QR Premer-Mınıstriniń orynbasary Berdibek Saparbaev aıtty, dep habarlaıdy QazAqparat tilshisi.

«Nur-Sultan qalasynda Abaıdyń 175 jyldyq mereıtoıyn ótkizýge baılanysty qala ákimshiligimen kelistik. Qazir qala ákimshiligi jer bóldi. Óz esebinen jobalyq-smetalyq qujat jasaýǵa kiristi. Bizge tapsyrma berseńiz, «Samuryq-Qazyna» jáne basqa da kompanııalardyń esebinen Nur-Sultan qalasynda «Abaı álemi» degen úlken ortalyq salsaq degen oıymyz bar. Oǵan qosa, qala ákimshiligi óz esebinen Abaı kóshesiniń boıynda uly aqynǵa qosymsha úlken eskertkish ornatatyn bolady», - dedi Berdibek Saparbaev.

Premer-Mınıstrdiń orynbasary aqynnyń 175 jyldyq mereıtoıyna oraı mektepterde, oqý oryndarynda Abaı álemine qatysty sabaqtar, sıpozıýmdar, konferentsııalar sııaqty sharalar ótkizilý tıistigin aıtty.