Elordada Abaı murasy men dinı saýattylyq dáripteldi
ASTANA. KAZINFORM — Abaı kúnine oraı elordalyq saıabaqta turǵyndardyń dinı saýattylyǵyn arttyrýǵa baǵyttalǵan aktsııa ótti, dep habarlaıdy Astana qalasy ákimdiginiń resmı saıty.
Elordadaǵy «Jetisý» saıabaǵynda Abaı kúnine oraı «Ashyq alań» atty aýqymdy aqparattyq-túsindirý aktsııasy uıymdastyryldy. Іs-sharany «QAMQOR-ASTANA» qoǵamdyq qory Astana qalasy ákimdiginiń Din isteri basqarmasynyń resmı qoldaýymen ótkizdi.
Kezdesýdiń basty maqsaty — elorda turǵyndarynyń dinı saýattylyǵyn arttyrý, dástúrli ári ulttyq qundylyqtardy dáripteý, sondaı-aq azamattardyń destrýktıvti dinı aǵymdardyń yqpalyna túsýiniń aldyn alý.
— Іs-shara Abaıdyń «Aqyryn júrip, anyq bas, eńbegiń ketpes dalaǵa» degen taǵylymdy sózimen úndes uran aıasynda ótti. Ásirese jas urpaqqa erekshe kóńil bólindi. Olar úshin Otanǵa, otbasylyq qundylyqtarǵa jáne bilimniń mańyzyna arnalǵan maqal-mátelder saıysy uıymdastyryldy. Qyzyqty vıktorınalar, tanymdyq oıyndar men ınteraktıvti sabaqtar qatysýshylardyń dúnıetanymyn keńeıtip qana qoımaı, halyqtyń baı tarıhı jáne mádenı murasy týraly túsinigin arttyrýǵa múmkindik berdi, — delingen taratylǵan aqparatta.
Baǵdarlamanyń negizgi bóligi «suraq-jaýap» formatyndaǵy arnaıy aqparattyq sessııa boldy. Mamandar men sarapshylar qala turǵyndaryna dinı saýattylyqtyń negizgi qaǵıdalary, Qazaqstan Respýblıkasynyń din salasyndaǵy qoldanystaǵy zańnama talaptary týraly aıtyp, radıkaldy jáne destrýktıvti ıdeologııalardyń yqpalyna urynýdyń belgileri men qaýipterin túsindirdi. Qatysýshylar ózderin tolǵandyrǵan saýaldaryn qoıyp, bilikti mamandardan naqty jaýap aldy.
Aqparatty bekitý maqsatynda volonterler saıabaqqa kelgen turǵyndarǵa úsh myńnan astam aqparattyq broshıýra taratty. Baspa materıaldarynda paıdaly keńester, senimdi ári tekserilgen aqparat kózderiniń tizimi, Qazaqstan aýmaǵynda qyzmetine tyıym salynǵan terrorıstik jáne ekstremıstik uıymdardyń tizimi, sondaı-aq zań talaptaryna qatysty túsindirmeler qamtyldy.
Sonymen qatar alańda taqyryptyq beınerolıkter kórsetildi. Aktsııa sońynda jeńimpazdardy marapattaý rásimi ótti. Zııatkerlik jáne shyǵarmashylyq baıqaýlarda úzdik shyqqandarǵa, sondaı-aq is-sharany ótkizýge belsene atsalysqan volonterlerge alǵys hattar men baǵaly syılyqtar tabystaldy.
Uıymdastyrýshylardyń aıtýynsha, mádenı-aǵartýshylyq jumysty Abaı murasyn dáripteýmen jáne ashyq dıalogpen ushtastyrý — qoǵamdyq kelisimdi nyǵaıtyp, elorda óńirindegi rýhanı qaýipsizdikti qamtamasyz etýdiń tıimdi tetikteriniń biri.
Buǵan deıin Abaı kúnine arnalǵan is-sharalarǵa myńnan asa áskerı qyzmetshi qatysqanyn jazǵanbyz.
