Elordada Abaı kúnine arnalǵan halyqaralyq onlaın dáris-kontserti ótip jatyr

NUR-SULTAN. QazAqparat – Nur-Sultan qalasynda Abaı Qunanbaıulynyń týǵan kúnine oraı onlaın formatta dáris-kontsert ótip jatyr, dep habarlaıdy QazAqparat tilshisi.

Dál qazir elordadaǵy L.N. Gýmılev atyndaǵy Eýrazııa ulttyq ýnıversıtetinde Abaı Qunanbaevtyń týǵan kúnine oraı «Adamzattyń bárin súı, baýyrym dep» atty onlaın-kontserti ótip jatyr.

Onlaın formatta ótip jatqan aıtýly sharanyń maqsaty – otandastarymyz ben alys-jaqyn sheteldegi qandastarymyzǵa Abaı men onyń murasyn odan ári dáripteý.

«Qurmetti halaıyq, barshańyzdy búgingi Abaı kúni merekesimen quttyqtaımyn! Byltyr Memleket basshysy Qasym-Jomart Toqaevtyń Jarlyǵymen Abaı jyly jarııalandy. Osydan soń uly aqyn men onyń shyǵarmashylyǵyna erekshe mán berile bastady. Abaıdy Qazaqstanda ǵana emes álem boıynsha izdeı bastady. Memleket basshysynyń tapsyrmasyna saı, ótken jyldan bastap túrli deńgeıdegi sharalar qolǵa alyndy. Sonyń biri bizdiń ýnıversıtettiń qabyrǵasynda ashylǵan «Abaı akademııasy». Odan bólek, 20-dan astam zertteý kitaby dúnıege keldi. Búginniń ózinde uly aqynnyń qurmetine arnalǵan túrli sharalar ótip jatyr jáne atalǵan sharalar aldaǵy ýaqytta da óz jalǵasyn tabady dep oılaımyn», - dedi L.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov saltanatty sharanyń ashylý rásiminde.

Aıta ketsek, atalǵan onlaın sharaǵa Iran, Túrkııa, Mońǵolııa jáne Germanııa elinen qazaq qoǵamdyq birlestikteriniń ókilderi qatysyp jatyr.