Elordada «Abaı álemi» atty ádebı-sazdy kesh ótti
ASTANA. QazAqparat - Búgin Astana qalasynda «Rýhanı jańǵyrý» baǵdarlamasy aıasynda Abaı Qunanbaıulynyń týǵan kúnine arnalǵan «Abaı álemi» atty ádebı-sazdy is-sharasy ótti, dep habarlaıdy Astana qalasy ákimdiginiń resmı saıty.
Іs-sharany Astana qalasynyń Tilderdi damytý jáne arhıv isi basqarmasy Abaı eskertkishiniń aldynda ótkizdi. Sharanyń basty maqsaty - óskeleń urpaqqa taǵylym retinde Abaıdyń rýhyna taǵzym etý, Abaıdyń rýhanı qundylyqtaryn kórsete otyryp, ádebı mektebin, til mektebin, ult pen rýh mektebin ashý, uly aqynnyń murasyn jastardyń sanasyna sińirý.
Abaıdyń týǵan kúnine arnalǵan is-shara eń aldymen Abaı eskertkishine gúl qoıý rásimimen bastaldy. Ádebı-sazdy keshtiń shymyldyǵyn Astana qalasy ákiminiń orynbasary Ermek Amanshaev pen aqyn Nesipbek Aıtuly ashty.
«Abaı qazaq rýhanııatynyń jaryq juldyzy, ár zamanda túlep, jańaryp otyrady. Abaı - óz zamanyn jańǵyrtqan, jańartqan aqyn. Abaı halqyn uly mádenıetke, uly rýhanııatqa shaqyrdy», dedi aqyn, Memelekettik syılyqtyń laýreaty Nesipbek Aıtuly.
Іs-shara barysynda Qazaqstan Respýblıkasynyń Eńbek sińirgen ártisi Kenjeǵalı Myrjyqbaı, dástúrli án dúldúli Erlan Rysqalı ózge de elorda ónerpazdary Abaı ánderin oryndady.
«Biz Abaı atamyzdyń rýhanı murasyna qaıta-qaıta oralyp, onyń tereń tuńǵıyǵyna bata túsemiz. Sebebi Uly oıshyl atamyz shyǵys poezııasynda qalyptasqan uly dástúrlerdi jalǵastyrýshy ǵana emes Ferdoýsı, Zınamı, Álisher Naýaı sekildi shyǵystyń Uly oıshyldarynyń izbasary, rýhanı oıdy odan ary damytýshy. Adamzat órkenıetine óz úlesin qosqan uly qaıratker», dedi Ermek Amanshaev.
Sonymen qatar, keshte Astana qalasy Memlekettik akademııalyq fılarmonııasynyń qazaq orkestri qazaq kúıleri men túrli kompozıtsııalar tartý etip, tanymal kúıshi Aıbek Bekbosyn Abaıdyń kúıin shertti, Abaıdyń obrazy somdalyp, monologtar oqyldy, jas aqyndar Abaı óleńderin jáne aqynǵa arnalǵan óz jyrlaryn oqydy.
Sondaı-aq, kópshilikke arnalyp ashyq aspan astynda «Abaıdyń murasy - qazaqtyń eń asyl qazynasy» atty kitap kórmesi uıymdastyryldy.
Hakim Abaıdyń týǵan kúnine arnalǵan sharaǵa zııaly qaýym ókilderi, ardagerler men aqsaqaldar, qala basshylyǵy, oqý oryndarynyń, qoǵamdyq birlestikter men jastar uıymdarynyń jetekshileri men ókilderi jáne qala turǵyndary men qonaqtary qatysty.
