Elordada «Abaı akademııasy» ǴZI mamandary abaıtanýdyń ózekti máselelerin talqylady
ASTANA. KAZINFORM – L.N. Gýmılev atyndaǵy Eýrazııa ulttyq ýnıversıteti janyndaǵy «Abaı akademııasy» ǵylymı-zertteý ınstıtýty «Abaı ortalyqtary jáne abaıtanýdyń qazirgi ózekti máseleleri» atty dóńgelek ústel ótkizdi.
Uly aqynnyń ádebı murasyn adam men qoǵam, bilim men ǵylym, din men dástúr, memleket pen bılik, til men mádenıet baǵyttary aıasynda jańasha zerdeleý arqyly uly aqyndy básekege qabiletti qoǵam qurý men ıntellektýaldy ult qalyptastyrýdyń temirqazyǵy retinde nasıhattaýdy maqsat etken jıynda Abaı ortalyqtarynyń atqarylyp jatqan jumystary jaıly aqparattar usynylyp, Abaıtanýǵa qatysty ózekti máseleler talqylandy.
«Abaı akademııasy» ǵylymı-zertteý ınstıtýtynyń dırektory Jandos Áýbákir QR Prezıdenti Qasym-Jomart Toqaev júktegen mindetterdiń sátti oryndalyp, elimizdegi abaıtaný ortalyqtarymen jáne belgili abaıtanýshy ǵalymdarmen birlesip keshendi taldamalyq zertteýler jalǵasyp jatqanyn atap ótti.
Sonymen qatar 2019 jyldan bastap «Abaı akademııasy» ǴZI qabyrǵasynda 80-nen astam ǵylymı-tanymdyq eńbekter jaryq kórgenine toqtaldy.
«2020 jyly Abaı Qunanbaıulynyń 175 jyldyǵyna oraı L.N. Gýmılev atyndaǵy Eýrazııa Ulttyq ýnıversıtetiniń tikeleı qarjylandyrýymen «Abaı akademııasynda» arnaıy jobalar aıasynda «Abaı akademııasy» atty serııamen 23 akademııalyq basylymdar oqyrmandarǵa usynyldy. 2021-2022 jyldary Abaı murasyn keńinen nasıhattaý maqsatynda Ǵylym jáne joǵary bilim mınıstrligi Ǵylym komıtetiniń tapsyrysy negizinde 48 ǵylymı-tanymdyq kitap ázirlendi», - dedi Jandos Áýbákir.
2023 jyly 12 ǵylymı-tanymdyq eńbek daıyndalyp, ǵylymı zertteý ınstıtýtynyń zertteý jumystarynyń sapaly ári joǵary deńgeıde iske asyrylýyna elimizdiń abaıtanýshy ǵalymdary, jetekshi zertteýshiler, ǵylym doktorlary, professorlar men akademıkter jáne «Abaı ortalyqtary» óz úlesterin qosqanyn atap ótken jón. Bul baǵyttaǵy jumystar óz jalǵasyn taba bermek.
