Elordada abattandyrý erejelerin buzǵany úshin 130-dan astam qurylys kompanııasyna aıyppul salyndy
ASTANA. QazAqparat - Qalanyń sanıtarlyq jaǵdaıyn jaqsartý jáne túrli qoqys úıindileriniń paıda bolýyn boldyrmaý maqsatynda polıtsııa departamenti biryńǵaı anyqtamalyq qyzmetpen birlesip, abattandyrý erejelerin buzý faktilerin anyqtaý boıynsha jumys júrgizdi, – dep habarlaıdy Polisia.kz.
Jeti aı ishinde 1 721 quqyq buzýshy ákimshilik jaýapkershilikke tartyldy, onyń ishinde 134 qurylys kompanııasy men 89 qyzmet kórsetetin uıym bar. Aıyppuldardyń jalpy somasy 19 mln teńgeden asady.
– Budan basqa belgilenbegen jerlerge qoqysty tastap ketetin adamdardy anyqtaý boıynsha jumystar júrgizilýde. Jyl basynan beri 240 júrgizýshi ákimshilik jaýapkershilikke tartyldy. Olarǵa 6 mln teńgeden astam aıyppul salyndy. Sondaı-aq 33 júrgizýshi topyraq, qoqys, sýsymaly qurylys jáne basqa da materıaldardy jabynsyz tasymaldaǵany úshin jaýapqa tartyldy, – dedi polıtsııadan.
Reıdtik is-sharalar barysynda tártip saqshylary qala aýmaǵyna qurylys qoqystaryn tastaǵan 39 jastaǵy KamAZ júrgizýshisin anyqtady. Er adamǵa 30 AEK (103 500 teńge) mólsherinde aıyppul salyndy.
Aıta keteıik, Astanada júk kólikterine arnalǵan kommýnaldyq turaq ashyldy. Búgingi tańda onda ártúrli quqyq buzýshylyqtary bar 12 júk kóligi qoıylǵan.
