Elordada «A.Baıtursynuly taǵylymy: til, termınologııa, ádisteme» atty halyqaralyq ǵylymı-teorııalyq konferentsııa ótedi
ASTANA. 9 jeltoqsan. QazAqparat - Erteń L.Gýmılev atyndaǵy Eýrazııa ulttyq ýnıversıteti «A.Baıtursynuly taǵylymy: til, termınologııa, ádisteme» atty halyqaralyq ǵylymı-teorııalyq konferentsııa uıymdastyrady,
dep habarlady atalǵan bilim ordasynyń baspasóz qyzmetinen.
Konferentsııanyń maqsaty - A.Baıtursynulynyń ómiri men shyǵarmashylyǵyna jan-jaqty ǵylymı taldaýlar jasaý; til men ádebıet, pedagogıka, ádisteme salalaryndaǵy A.Baıtursynuly salǵan ǵylymı negizderdi odan ári damytý, nyǵaıtý, bolashaq baǵyttardy aıqyndaý. Sondaı-aq qazirgi gýmanıtarlyq bilim paradıgmalary turǵysynan ǵalymnyń róli men ornyn baǵamdaý kózdelip otyr.
Іs-sharaǵa QR Mádenıet mınıstrligi Til komıtetiniń tóraǵasy Baýyrjan Omarov qatysady. Konferentsııa jumysynda A.Baıtursynuly jáne qazaq til biliminiń, sondaı-aq, A.Baıtursynuly jáne qazaq ádebıetiniń máseleleri, qazirgi Ahmettaný máselesi men A.Baıtursynuly jáne qazaq tili men ádebıetin oqytýdyń jańasha ádis-tásilderi boıynsha Parlament Senatynyń depýtaty Ǵ.Esim, belgili ǵalymdar D.Qamzabekuly, Sh.Qurmanbaıuly, T.Bóribaev, M.Serǵalıev, R.Syzdyq, A.Іsmaqova baıandama jasaıdy.
«Konferentsııaǵa elimizdiń jáne shet eldiń joǵary oqý oryndarynyń oqytýshy-professorlyq quramy men jas ǵalymdar qatysady. Shara barysynda til biliminiń ózekti máseleleri talqylanyp, ǵalymdardyń ózara tájirıbe almasyp, pikir alysýyna múmkindik beriledi», - delingen baspasóz habarlamasynda.
