Elordada 9 kún ishinde 132 myńnan astam adam sanaqtan ótti
Mundaı oryndar Statıstıka departamentterinde, Halyqqa qyzmet kórsetý ortalyqtarynda, «Qazposhta» fılıaldarynda jáne Han Shatyr, KeruenCity, Saryarqa, Asia Park, Evrazııa, Keruen sııaqty iri saýda oıyn-saýyq ortalyqtarynda ashylǵan. Sondaı-aq, qazir «MEGA Silk Way» ortalyǵynda da osyndaı ýchaskeni ornatý boıynsha kelissózder júrgizilýde.
Munda respondentterge aımaqtyq departamentterdiń keńesshileri kómektesedi. Qazir el boıynsha sanaqtyń 3 155 buryshy jumys isteıdi. Qosymsha taǵy ashý josparlanýda.
Búgin Ulttyq statıstıka bıýrosynyń basshysy Nurbolat Aıdapkelov elordadaǵy sanaq buryshtarynyń jumysymen tanysty.
«Búkil Qazaqstan boıynsha biz onlaın sanaq júrgizý úshin óz betimen ótýge múmkindigi joq adamdar úshin 3 myńnan astam burysh ashtyq. Keńesshiler sanaqtan ótýge kómektesedi. Saıttyń qatyp qalǵan sátteri boldy, biraq bul provaıderlermen bolǵan problemalar, óıtkeni kóptegen adamdar sanaqtan mobıldi arnalar arqyly ótedi. Bizdiń júıelerimizdi júkteý shamamen 60% quraıdy, ıaǵnı bizde eshqandaı qıyndyq joq. Call-ortalyq táýlik boıy jumys isteıdi. UQK-niń memlekettik tehnıkalyq qyzmeti aqparattyq qaýipsizdikke jaýap beredi. Olar kún saıyn baqylap otyrady. Ddos shabýyldary bolǵan joq, óıtkeni tehnıkalyq qyzmet mundaı qaýip-qaterdi joıady», - dedi Nurbolat Aıdapkelov.
Bıýro basshysy sondaı-aq, Play Market-te halyq sanaǵy boıynsha jalǵan qosymshanyń paıda bolýyna túsinikteme berdi.
«Keshe biz jalǵan qosymsha paıda boldy dep aıttyq. Biz Qazaqstannan ony buǵattaı almaımyz, óıtkeni ol syrtqy serverlerde ilinip turady. Biz óz tarapymyzdan, ony tapqanymyzdaı, qoldan kelgenniń bárin jasadyq: sol máseleni sheshýmen aınalystyq, hat jazdyq, memlekettik tehnıkalyq qyzmet osymen aınalysýda. Azamattardy sanaqtan tek resmı arnalar arqyly ótýge shaqyramyz. Ol úshin sanaq.gov.kz saıty, Egov elekrondy úkimeti, Aitu qosymshasy bar», - dedi Aıdapkelov.
Ulttyq statıstıka bıýrosynyń basshysy aldymen Almaty aýdanynyń HQKO-daǵy sanaq buryshyna bardy. Munda keńesshiler turǵyndarǵa onlaın rejımde sanaqtan ótýge kómektesedi.
Dál osyndaı buryshtar «Qazposhta» fılıaldarynyń birinde jumys isteıdi. Búginnen bastap turǵyndar osyndaı buryshqa jáne iri saýda ortalyqtarynyń biri — «KeruenCity»-ge barýǵa múmkindigi bar. Bir kúnde munda 40-qa jýyq adam sanaqtan ótti. «KeruenCity» saýda oıyn-saýyq ortalyǵynyń keńesshileri azamattarǵa 9:00-den 18:00-ge deıin sanaq júrgizýge kómektesedi. Nur-Sultan qalasy boıynsha barlyǵy 17 oryn ashyldy.
10 qyrkúıek saǵat 13:00-degi jaǵdaı boıynsha elimizde onlaın sanaqtan 1 421 092 respondent ótti. Sanaq.gov.kz saıtynyń ózinde suraqtan 1 216 369 adam ótse, egov portalynda avtorızatsııadan 147 702 azamat ótti, taǵy 57 021 respondent sanaq suraqtaryna Aitu qosymshasyn paıdalana otyryp jaýap berdi. 9 kúnniń qorytyndysy boıynsha Nur-Sultanda 132 153 adam sanaqtan ótti.
