Elordada 8 naýryz merekesine oraı qandaı is-sharalar ótedi
ASTANA. KAZINFORM – Astanada 8 naýryz merekesine oraı birqatar mádenı is-shara ótkizý josparlanyp otyr. Bul týraly Astana ákimdiginiń resmı saıty habarlady.
6 naýryz kúni saǵat 11:00-de Zaǵıp jáne nashar kóretin azamattarǵa arnalǵan mamandandyrylǵan kitaphanada «Anamnyń aıaly alaqany» ádebı keshin uıymdastyrady.
Bul kúni aýdan ákimdikterinde kópbalaly analar arasynda «Altyn alqa» jáne «Kúmis alqa» tósbelgilerin tabystaý saltanaty ótedi.
Sondaı-aq Qazaq ulttyq horeografııa akademııasynda merekelik kontsert uıymdastyrý josparlanyp otyr.
6 naýryz kúni saǵat 19:00-de M. Gorkıı atyndaǵy Memlekettik akademııalyq orys drama teatry jáne Ulttyq ulan birlesip kórermen nazaryna «Álııa» qoıylymyn usynady.
Dál osy kúni saǵat 19:00-de «Jastar» Saraıynda «Áıelderge taǵzym» atty halyqaralyq áıelder kúnine oraı merekelik kontsert ótedi.
7-8 naýryz aralyǵynda Saraıshyq aýdanynda kommýnaldyq qyzmet mamandaryna qyzǵaldaq taratý is-sharasy ótedi.
6-8 naýryz kúnderi Baıqońyr aýdanynyń ákimi tyl eńbekkerlerin arnaıy úıine baryp, Halyqaralyq áıelder kúnimen quttyqtaıdy.
7 naýryz kúni qala kóshelerinde elordanyń názik jandylaryna qyzǵaldaq taratý is-sharasy uıymdastyrylady.
«ALJIR» memorıaldy-murajaı kesheninde 7-8 naýryz kúnderi saǵat 10:00-18:00 aralyǵynda «Ana – ómirdiń gúli» kórmesi ótedi.
Á.Mámbetov atyndaǵy memlekettik drama jáne komedııa teatry 8 naýryz kúni saǵat 19:00-de «Kelinder kóterilisi» jáne 9 naýryz saǵat 19:00-de «Kúshik kúıeý» komedııalaryn usynady.
Al Qýyrshaq teatry 7 naýryz saǵat 12:00-de jáne 16:00-de, 8-9 naýryz saǵat 12:00-de jáne 16:30-da «Maýglı» ertegisiniń qoıylymyn usynady.
Sol sııaqty Mýzykalyq jas kórermen teatry 8 naýryzda saǵat 18.00-de «Teatr álemi» merekelik qoıylymyn usynady. Sonymen qatar, M. Gorkıı atyndaǵy Memlekettik akademııalyq orys drama teatry mereke kúni 18:00-ge «Brak po-ıtalıanskı» qoıylymyn ázirlep otyr.
8 naýryzda «Qazaqstan» ortalyq kontsert zalynda merekelik kontsert, «Jastar» teatrynda «Janarymdaǵy jalǵyz áýen» teatrlandyrylǵan kontserttik baǵdarlama ótedi.
9 naýryz kúni saǵat 17:00-de E.Rahmadıev atyndaǵy Memlekettik akademııalyq fılarmonııasynyń kameralyq zalynda qazaq orkestriniń ártisi, symqobyzshy, mádenıet salasynyń úzdigi Botagóz Táshimovanyń «Asyl qazyna» atty jeke kontserti ótedi.