Elordada 8 myńnan asa kólikke aıyppul salyndy
ASTANA. QazAqparat - Ekologııalyq jaǵdaıdy jaqsartý maqsatynda ekologııa departamenti ІІD jol polıtsııasymen birlesip qalada avtokólikterge tekseris júrgizip, gazdalý jáne tútindetý deńgeıin asyrý faktisin anyqtady, dep habarlaıdy QazAqparat ákimdiktiń medıa ortalyǵyna silteme jasap.
«Bıyl 9 aıda 12 907 buzýshylyq tirkelip, jalpy somasy 39 mln teńgege 8 291 ákimshilik aıyppul salyndy», - dedi Tabıǵı resýrstar jáne tabıǵatty paıdalanýdy retteý basqarmasynyń basshysy Musa Tanabaev elordanyń aýa basseıniniń jaǵdaıyna arnalǵan brıfıng barysynda.
Onyń aıtýynsha, Astanada aýa atmosferasynyń sapasyn jaqsartý jóninde birqatar sharalar júzege asyrylyp jatyr.
Atap aıtqanda, kommýnaldyq kásiporyndardyń 854 kóligi gazga kóshirildi. Jeke jáne zańdy jeke tulǵalarǵa gaz balondyq qurylǵy ornatýǵa 14 myńnan astam ruqsat berildi. 500-den astam taksı qala ákimdigi men taksomotorlyq kompanııalar arasynda qol qoıylǵan memorandýmǵa sáıkes gazga aýystyrylady.
Buǵan qosa, elordada jolaýshylar tasymalynda EÝRO-5 sanatyna jatatyn 738 avtobýs paıdalanylady. Onyń 380-i 2017 jyly satylyp alyndy.
