Elordada 8 myń úlesker bıyl páterleriniń kiltin alady
NUR-SULTAN. QazAqparat - Elordada 8 myń úlesker bıyl páterleriniń kiltin alady. Bul týraly Nur-Sultan qalasynyń ákimi Altaı Kólginov aıtty, dep habarlaıdy QazAqparat tilshisi.
«Árbir úlestik qurylys nysany boıynsha jumystar atqarylyp jatyr. Úlestik qurylys – kúrdeli máseleniń biri. Keı úılerde qazanshuńqyr ǵana bolsa, keıbireýiniń úı qańqasy ǵana bar. Biraq árbir nysan boıynsha qadamdyq is-sharalar jospary bar. Búgin, «Qorǵaljyn oramy», «Trıýmf Esil-2», «Turan Syǵanaq» nysandaryna bardym. Investorlar anyqtaldy. «Qorǵaljyn oramynda» qurylys jumystary qaıta bastaldy. Qalǵan eki úıde qurylys jumystary kelesi aıda, sharttarǵa qol qoıylǵannan keıin bastalady», - dedi elorda ákimi.
Nur-Sultan qalasy ákimdiginiń Facebook paraqshasynda jarııalanǵan aqparatqa qaraǵanda, bıyl ótken jylmen salystyrǵanda eki ese kóp úı salynyp, paıdalanýǵa beriletin bolady. 8 myń úleskeri bar 20 úıdiń turǵyndary óz páterlerine kirip, turǵyn úı qujattaryn alady.
