Elordada 8 mektep ashyldy
NUR-SULTAN. QazAqparat – Elordada 8 mektep ashyldy. Qala ákimi Altaı Kólginov oqýshylardy oqý jylynyń bastalýymen quttyqtaı otyryp, 8 jańa mektep ashylǵanyn málim etti, dep habarlaıdy QazAqparat qala ákimdigine silteme jasap.
«1 qyrkúıek – ata-analar men oqýshylar úshin mańyzdy kún. Oqý jylyn dástúrli oflaın formatta bastaımyz. Baǵa úshin emes, bilim alý úshin oqyńyzdar! Kúndelikti eńbek pen bilim arqyly bolashaqta úlken jetistikterge jete alasyz! Eń bastysy – ózińizge, óz kúshińizge sený.
Oqýǵa qolaıly jaǵdaı jasaý úshin jyl saıyn jańa mektepter salyp jatyrmyz. Bıyl 15 mektep salamyz, olardyń 8-i ashyldy. Jańa mektepterdiń qatarynda jeke ınvestıtsııa esebinen salynǵan mektepter de bar», dedi ol.
Ákim №23 orta mektepke (Óndiris eldi mekeni, Baıqońyr aýdany) abraǵn.
«Memleket basshysynyń tapsyrmasyna sáıkes mektepte jaıly korpýs salyndy. Jańa mektep eki aýysymda 1200 balaǵa eseptelgen. Jańa ǵımaratta robot tehnıkasy, hımııa, bıologııa, fızıka, «STEM«, «Intellektým«, ınklıýzııany qoldaý kabıneti jáne t.b. kabınetter bar. Prezıdent atynan mektepke avtobýs berildi», - dedi Altaı Kólginov.
Qala ákimi №92 jańa mektepke barǵan (Maıqaıyń kóshesi, Almaty aýdany). Bul mektep 2 400 oqýshyǵa eseptelgen (eki aýysymda). Mektepte hımııa, bıologııa, fızıka, robototehnıka, «STEM», «Intellektým» jáne t.b. jańa modıfıkatsııadaǵy biregeı kabınetter ashyldy.
«15 mekteptiń qurylysy 40 myńnan astam oqýshy ornyn ashýǵa múmkindik beredi. Ótken jylmen salystyrǵanda oqýshy oryndarynyń sany 2 eseden artyq, al 2019 jylmen salystyrǵanda 4 eseden artyq ulǵaımaq.
Keshendi jospar aıasynda 5 jyldyq kezeńge 67 mektep salý josparlanyp otyr. Mektepterdi MJÁ aıasynda jáne jeke ınvestıtsııalar esebinen salyp jatyrmyz»,- dedi ol.
Ákimniń aıtýynsha, ınvestıtsııalyq keńesterde turǵyndar arasynda úlken suranysqa ıe 30-dan astam jekemenshik oqý orynynyń qurylysyna qoldaý kórsetilgen.
