Elordada 8 kólikti zańsyz satqan avtosalon menedjeri 6 jylǵa sottaldy
ASTANA. KAZINFORM — Astanada avtosalonnyń satý bóliminiń menedjeri jalpy quny 53,1 mln teńge bolatyn segiz avtokólikti zańsyz satyp, taǵy úsh kólikti jetkizýge ýáde berip, satyp alýshydan 16,5 mln teńge alǵan. Sot ony alty jylǵa bas bostandyǵynan aıyrdy.
Astana qalasynyń qylmystyq ister jónindegi aýdanaralyq sotynyń materıaldaryna sáıkes, sottalýshy avtodılerlik uıymnyń satý bóliminde menedjer bolyp jumys istegen. Ol jalǵan qujattar rásimdeý arqyly jalpy quny 53,1 mln teńge bolatyn segiz JAC J7 avtokóligin zańsyz satyp, satyp alýshylardan túsken aqshany kásiporyn kassasyna ótkizbegen.
Budan bólek, 2026 jylǵy qańtarda ol bir satyp alýshyǵa osy markadaǵy úsh kólikti tómendetilgen baǵamen alyp berýdi usynǵan. Alaıda 16,5 mln teńge alǵanymen, kólikterdi bermeı, aqshany óz qalaýy boıynsha jumsaǵan. Osylaısha, keltirilgen jalpy zalal 69,6 mln teńgeni qurady.
Sot qandaı jaza taǵaıyndady?
Prokýror sottalýshyny segiz jylǵa bas bostandyǵynan aıyrýdy suraǵan. Al sottalýshy men onyń qorǵaýshysy áreketteriniń bir epızodyn qaıta saralap, jeńildetetin mán-jaılardy eskere otyryp, neǵurlym jeńil jaza taǵaıyndaýdy ótingen.
Sot birinshi epızodty senip tapsyrylǵan múlikti ıemdenip alýdan alaıaqtyqqa qaıta saralady. Óıtkeni sottalýshy avtokólikterdi materıaldyq jaýapkershilikke qabyldamaǵan, olardyń saqtalýyna jaýap bermegen jáne olardy óz betinshe satý men berý ókilettigine ıe bolmaǵan.
Jaza taǵaıyndaý kezinde sot onyń kinásin moıyndap, ókinýin, kámeletke tolmaǵan balasynyń baryn jáne buryn sottalmaǵanyn eskerdi. Jaýaptylyqty aýyrlatatyn mán-jaılar anyqtalǵan joq.
— Qylmystyq quqyq buzýshylyqtar jıyntyǵy boıynsha sottalýshy alty jylǵa bas bostandyǵynan aıyryldy. Sonymen qatar oǵan segiz jyl boıy kommertsııalyq uıymdarda taýarlar men qyzmetterdi satýǵa baılanysty laýazymdardy atqarýǵa tyıym salyndy. Jábirlenýshilerdiń azamattyq talaptary qanaǵattandyryldy. Úkim ázirge zańdy kúshine engen joq, — delingen sot úkiminde.
Jaqynda Astanada satyp alýshylardy aldaǵan avtosalon dırektory sottalǵanyn jazǵan edik.
