Elordada 8 avtokólik urlyǵyna qatysty kúdikti ustaldy
NUR-SULTAN. QazAqparat – 8 avtokólik urlyǵyna qatysy bar degen kúdikpen Qostanaı oblysynyń 27 jasar turǵyny ustaldy. Bul týraly elorda Polıtsııa departamentiniń baspasóz qyzmetinen málim etti, dep habarlaıdy QazAqparat.
«Elorda turǵyny jalpy somasy 285 myń teńge bolatyn jeke múlkiniń urlanǵanyn habarlady. Jábirlenýshiniń sózine qaraǵanda, belgisiz adam onyń úıine kirip, aqshasyn, uıaly telefonyn, qujattary men kıimin jymqyrǵan. Jedel izdestirý sharasynyń barysynda urlyqqa kúdikti Qostanaı oblysynyń 27 jastaǵy jumyssyz turǵyny ustaldy», - delingen habarlamada.
Tergeý amaldary barysynda atalǵan adam budan bólek qazan aıyndaǵy avtokólik urlyǵy boıynsha kúdikke ilingen. Osy oraıda VAZ, VOLKSWAGEN GOLF, GAZ, MAZDA markaly kólikter urlanǵany anyqtaldy. Bul avtomobılderdiń barlyǵyn polıtsııa qyzmetkerleri anyqtaǵan kórinedi.
«Qazirgi ýaqytta polıtsııa sotqa deıingi tergeýdi júrgizip jatyr. Kúdiktiniń basqa da qylmystarǵa qatystylyǵy tekserilýde», - dep atalyp ótken Polıtsııa departamentiniń málimetinde.
