Elordada 8,5 myń úı gazǵa qosylǵan

ASTANA. QazAqparat – Elordada 8,5 myń úı gazǵa qosylǵan. Bul týraly Astana qalalyq otyn-energetıkalyq keshen jáne kommýnaldyq sharýashylyq basqarmasy otyn-energetıkalyq resýrstar bóliminiń basshysy Maqsat Esmaǵulov aıtty, dep habarlaıdy QazAqparat tilshisi.

«Qalada turǵyn úı alaptarynda ornalasqan 20 myń jeke turǵyn úı bar. Olardyń ishinde búginde 12 myń abonentke gaz tartylyp, 8,5 myńyna gaz qosylǵan. Aı saıyn bul san artyp keledi. Adamdar munyń qanshalyqty yńǵaıly ári qolaıly ekenin kórip otyr», - dedi Maqsat Esmaǵulov elordanyń kommýnıkatsııalar qyzmeti baspasóz ortalyǵynda ótken brıfıngte.

Sonymen qatar ol qalanyń gaz jetkizilgen aýdandaryn atap ótti.

«Kóktal men Ońtústik-Shyǵys turǵyn úı alabtarynda 5 úıdiń tórteýi gazǵa qosylǵan. Menińshe, aldaǵy jylý berý maýsymynda bul san birshama artatyn bolady. Qalada Kóktal-1, Kóktal-2, Agroqalashyq, Óndiristik, Ońtústik-Shyǵys, Kúıgenjar, Mıchýrıno, Transnatsıonalnyı turǵyn úıı alaptary jáne 4 shaǵyn aýdan, atap aıtqanda Máskeý men Potanın, Nurbesik, Aqbıdaıdaǵy úılerge gaz tolyqtaı tartyldy. Munan bólek, 1 zaýyt, 15 kóppáterli turǵyn úı, shamamen 300 shaǵyn jáne orta bıznes sýbektisi kógildir otynmen qamtyldy», - dedi ol.