Elordada 735 myń adam koronavırýsqa qarsy vaktsınalanady
NUR-SULTAN. QazAqparat – Elordada koronavırýsqa qarsy vaktsına salynatyn 735 myń adam bar. Bul týraly Nur-Sultan qalalyq qoǵamdyq densaýlyq saqtaý basqarmasynyń basshysy Tımýr Muratov aıtty, dep habarlaıdy QazAqparat tilshisi.
«Memleket basshysynyń tapsyrmasy boıynsha halyqty koronavırýs ınfektsııasyna qarsy kezeń-kezeńimen egý vaktsınanyń túsýine baılanysty osy jyldyń 1 aqpanynan bastaldy. Vaktsınatsııa 18-den 64 jasqa deıingi adamdarǵa jasalady. Nur-Sultanda osy sanatqa kiretin 735 myń adam bar. Vaktsınatsııa erikti negizde jáne ár azamatqa tegin jasalady. Turaqty profılaktıkalyq egýlerge jáne ýaqytsha medıtsınalyq qarsy kórsetilimderi bar adamdarǵa KVI-ǵa qarsy ekpe salynbaıdy. Sondaı-aq, koronavırýstyń aýyr jaǵdaıy jáne sımptomsyz belgileri bar adamdar ekpe alýǵa jatpaıdy», - dedi ol Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, juqpaly aýrýy bar, onyń ishinde KVI-men aýyrǵan naýqaspen baılanysta bolǵan adamdar karantın merzimi aıaqtalǵannan keıin ǵana vaktsınalanady.
«Ekpe salý aldynda COVID-19 qarsy antıdenelerdiń bar-joǵyn anyqtaý úshin skrınıng jasalmaıtynyn atap ótkim keledi. Koronavırýs ınfektsııasynyń kez kelgen formasymen aýyrǵan patsıent emdelip shyqqannan keıin densaýlyq jaǵdaıyna baılanysty keminde 6 aıdan keıin ekpe alǵany durys. Vaktsınany qabyldaýǵa qarsy kórsetilimder - vaktsınanyń kez kelgen komponentine joǵary sezimtaldyq, aýyr allergııalyq reaktsııalar. Júkti áıelder jáne bala emizetin analarǵa vaktsına alýǵa bolmaıdy. Ekpe balalarǵa jáne 65 jastan asqan adamdarǵa salynbaıdy», - dedi Tımýr Muratov.
