Elordada 700-den astam medıtsına qyzmetkeri koronavıýrsqa qarsy vaktsına saldyrtty
NUR-SULTAN. QazAqparat – Elordada 719 medıtsına qyzmetkeri koronavıýrsqa qarsy vaktsına saldyrtty. Bul týraly Ortalyq kommýnıkatsııalar qyzmetinde Nur-Sultan qalasynyń qoǵamdyq densaýlyq saqtaý basqarmasynyń basshysy Tımýr Muratov málim etti, dep habarlaıdy QazAqparat tilshisi.
«Elimizde koronavırýs ınfektsııasyna qarsy vaktsınalaý jalǵasýda. 1 aqpannan bastap osy ýaqyt aralyǵynda 719 adamǵa vırýsqa qarsy vaktsına salyndy, ıaǵnı 78 paıyzdan artyq. Birinshi kezeńge vırýsty juqtyryp alý qaýpi joǵary tobyna jatatyn medıtsına qyzmetkerleri (juqpaly aýrýlar aýrýhanalary, jedel-járdem qyzmetkerleri, alǵashqy medıtsınalyq kómek kórsetý uıymdary, kópsalaly aýrýhanalardyń qabyldaý bólimderi) qyzmetkerleri vırýsqa qarsy ekpe alyp jatyr», - dedi T. Muratov.
Jalpy, 1-8 aqpan aralyǵynda vaktsınalamen 916 adam qamtylǵan edi, sonyń ishinde 719-yna ekpe salyndy.
Osy oraıda ol vaktsınatsııa erikti túrde, ár adamnyń ekpe alý-almaý quqyǵyn saqtaı otyryp jasalatynyn eske saldy.
«Búginde Qoǵamdyq densaýlyq saqtaý basqarmasynyń qoımasynda KVI-ǵa qarsy vaktsınanyń 1 531 dozasy bar. Eske salaıyq, turaqty profılaktıkalyq egýlerge jáne ýaqytsha medıtsınalyq qarsy kórsetilimderi bar adamdarǵa KVI-ǵa qarsy ekpe salynbaıdy. Sondaı-aq, koronavırýstyń aýyr jaǵdaıy jáne sımptomsyz belgileri bar adamdar ekpe alýǵa jatpaıdy. Juqpaly aýrýy bar naýqaspen, onyń ishinde KVI-men aýyrǵan naýqaspen baılanysta bolǵan adamdar karantın merzimi aıaqtalǵanǵa deıin vaktsına almaıdy», - dep naqtylady basqarma basshysy.
Birinshi kezeńde vaktsınatsııa bes qalalyq emhanada júrgizilip jatyr. Alaıda, keleshekte halyqty jappaı vaktsınalaý bastalǵan sátte qala boıynsha 36 uıymda emshara bólmeleri uıymdastyrylady.
