Elordada 7 jáne 9 mamyr merekelerine oraı birjolǵy áleýmettik tólemder jasalady

ASTANA. QazAqparat – Astana qalasy Jumyspen qamtý jáne áleýmettik qorǵaý basqarmasynyń basshysy Ilıa Skýb Otan qorǵaýshy jáne Jeńis kúnine arnalǵan áleýmettik tólemder týraly aıtyp berdi, dep habarlaıdy QazAqparat tilshisi.

«7 mamyr kúni elordada Otan qorǵaýshy kúni atalyp ótedi. Osy oraıda ákimdikte qala máslıhaty bekitken erejege sáıkes, birjolǵy tólemder qarastyrylǵan. Bul baǵytta qala boıynsha 250 mln teńge bólindi. Bul rette, jeńildikter boıynsha Ekinshi dúnıejúzilik soǵysy ardagerlerine teńestirilgen ardagerlerge 35 AEK (120 750 teńge) kóleminde tólem jasalady. Qazirgi kezde qalada osy sanattaǵy 436 adam bar», - dedi Ilıa Skýb Astana qalasy kommýnıkatsııalar qyzmetinde ótken baspasóz máslıhatynda.

Sonymen qatar, basqa memleketterdiń aýmaǵyndaǵy urys qımyldarynyń ardagerleri de 120 myń teńge somasynda birjolǵy tólem alady. Astanada osy sanattaǵy 899 adam adam turyp jatyr.

«Budan bólek, Qazaqstan Respýblıkasynyń «Ardagerler týraly» Zańynyń kúshi qoldanylatyn taǵy bir sanat bar. Osy oraıda tyl eńbekkerleri, qaza tapqan áskerı qyzmetshilerdiń otbasylary, Ekinshi dúnıejúzilik soǵys múgedeginiń artynan qalǵan zaıyby 11 AEK (37 950 teńge) kóleminde birjolǵy tólem alady. Qalada bul sanatqa jatatyn 2316 adam tirkelgen. Jalpy alǵanda bul baǵytta Astanadaǵy 3800-ge jýyq adam qamtylady», - dedi basqarma basshysy.

Buǵan deıin habarlaǵanymyzdaı, elordadaǵy maıdangerlerge Jeńis kúnine oraı 1,5 mln teńgeden beriledi. Qazirgi kezde qalada 10 ardager turyp jatyr.