Elordada 7 jáne 9 mamyr kúnderi ótetin merekelik is-sharalar kestesi jarııalandy

NUR-SULTAN. QazAqparat – Elordada aldaǵy 7 mamyr – Otan qorǵaýshylar kúni jáne 9 mamyr – Jeńis kúni merekelerine arnalǵan is-sharalar tizimi jarııalandy. Karantındik sharalarǵa baılanysty is-sharalardyń bári onlaın ótedi, dep habarlaıdy QazAqparat qala ákimdigine silteme jasap.

Elordanyń mektepterinde 6 mamyrǵa deıin Otan qorǵaýshylar kúni men Jeńis kúnine arnalǵan synyp jáne kýrator saǵattary, áskerı-patrıottyq tárbıedegi ánderdiń onlaın baıqaýy ótedi. Onlaın sharalardy Instagram jelisindegi «Astana jastary» jáne «Jas sarbaz» paraqshalarynan kórýge bolady.

Elordanyń «Bilim-ınnovatsııa» lıtseı-ınternaty» 5 mamyr kúni merekege oraı «Bir úzik syr» suhbatyn ótkizedi. Syr-suhbatty bilim mekemesiniń Instagram jelisindegi resmı paraqshasynan tamashalaýǵa bolady.

№4 qalalyq emhanada UOS ardagerleri men oǵan teńelgen tulǵalarǵa arnap medıtsınalyq tekserý uıymdastyrylady. Al №2 qalalyq emhana soǵys ardagerlerine arnalǵan úı kútimi jónindegi dárigerler keńesin ótkizedi. Bul sharalar 6 mamyrǵa deıin jalǵasady.

«Saıası qýǵyn-súrgin jáne totalıtarızm qurbandarynyń «ALJIR» memorıaldy-murajaı kesheni «Malınovka» izdeý klýbymen birlesip, 5 mamyr kúni tyl ardagerlerimen, «Aýǵan soǵysynyń ardagerleri men múgedekteri» QB ókilderimen, sondaı-aq «Erlikke taǵzym, ardagerge – qurmet» áskerı qyzmetshilerimen kezdesý ótkizedi.

Sonymen qatar 5-10 mamyr aralyǵynda UOS jaýyngerlerine arnalǵan monýmentaldy keshenge, «Otan qorǵaýshylar» memorıaldyq keshenine, M.Mámetova, B.Momyshuly eskertkishterine onlaın ekskýrsııa júrgiziledi. Tolyq málimetterdi Mádenıet basqarmasynan, Birikken murajaılar dırektsııasynan, tarıhı-mádenı murany saqtaý ortalyǵynan alýǵa bolady.

7 mamyr – Otan qorǵaýshylar kúni Qazaqstan telearnasy «Aqıqat pen ańyz» kontsert-spektalin usynady.

Otan qorǵaýshylar kúnine oraı «ANK Live» stýdııasynyń tikeleı efıri QR Qorǵanys mınıstrliginiń ókilderimen ótetin is-sharany usynady. Onlaın sharany Facebook, Instagram áleýmettik jelicinen kórýge bolady.

Nur-Sultan qalasy fılarmonııasy orkestri 8 mamyr kúni 22 UOS ardagerine arnap kóshpeli kontsert uıymdastyrady. Sol kúni Jas sarbaz áskerı-patrıottyq jobasy aıasynda ardagerlerge azyq-túlik sebeti tabys etiledi.

Al 9 mamyr – Jeńis kúnine oraı elorda kóshelerinde «Jeńis joldarymen» mobıldi is-sharasy ótedi. Dál osy kúni «Habar» telearnasynda «Er esimi – el esinde» kontserti jurtshylyq nazaryna usynylatynyn eske sala keteıik.

Aıta keteıik, elordadaǵy is-sharalardyń bári sanıtarlyq normalardy tolyqtaı saqtaı otyryp ótedi.