Elordada 65 myń adam vaktsına aldy – Aýyr asqyný tirkelgen joq
NUR-SULTAN. QazAqparat – Nur-Sultan qalasy Qoǵamdyq densaýlyq saqtaý basqarmasynyń basshysy Tımýr Muratov elordadaǵy vaktsına salý kórsetkishterin aıtyp berdi, dep habarlaıdy QazAqparat tilshisi.
«Qazirgi ýaqytta koronavırýs ınfektsııasymen kúrestiń mańyzdy kezeńi – halyqty vaktsınalaý. Vaktsınatsııa kúshti profılaktıkalyq shara bolyp sanalady jáne ony qoldanýdyń paıdasy aýrýdyń yqtımal qaýipterinen edáýir asyp túsedi. Ujymdyq ımmýnıtetti qalyptastyrý úshin 600 myńnan astam adamǵa nemese qala turǵyndarynyń kem degende 60%-yn vaktsınalaý josparlanǵan», - dedi spıker elorda ákimdiginde ótken brıfıngte.
Búgingi tańda elordada 65 myńǵa jýyq adam koronavırýs ınfektsııasyna qarsy vaktsına aldy. Bul medıtsınalyq qyzmetkerler, oqytýshylar, quqyq qorǵaý organdarynyń, dıplomatııalyq qyzmetterdiń qyzmetkerleri jáne sozylmaly aýrýlary bar adamdar jáne barlyq tilek bildirgen azamattar.
Dárigerdiń aıtýynsha, vaktsınadan keıingi aýyr asqynýlar tirkelmegen.
«Halyqty vaktsınatsııalaýmen keńinen qamtý úshin qala ákimi Altaı Kólginovtiń tapsyrmasymen egý pýnktteriniń sany 36-dan 100-ge deıin ulǵaıtyldy, alǵashqy medıtsınalyq-sanıtarlyq kómek uıymdary úshin jumys ýaqyty 8:00-den 24:00-ge deıin, oıyn-saýyq ortalyqtarynda 10:00-den 22:00-ge deıin uzartyldy. Sondaı-aq, qalanyń eki iri «Mega Silk Way» jáne «Han Shatyr» OSO-larynda egý aımaqtary uıymdastyryldy. Mysaly, tek bir apta ishinde «Mega Silk Way» 1 800-den astam adamǵa koronavıýrsqa qarsy ekpe saldy. Jaqynda mundaı pýnktter «Kerýen» saýda ortalyǵy men men «Abý-Dabı Plaza» kesheninde de ashylady. Qajet bolǵan jaǵdaıda vaktsınatsııa pýnktteri qalanyń qonaq úılerinde de ashylady», - dedi T. Muratov.
