Elordada 6 myńnan astam dáriger koronavırýs indetimen kúresip jatyr
NUR-SULTAN. QazAqparat – Qazirgi ýaqytta Nur-Sultan qalasynda COVID-19 indetine shaldyqqan naýqastardy 6 myńnan astam dáriger maman emdep jatyr. Bul týraly Nur-Sultan qalalyq qoǵamdyq densaýlyq saqtaý basqarmasynyń basshysy Tımýr Muratov aıtty, dep habarlaıdy QazAqparat tilshisi.
«Lokdaýn máselesi búginde bárin tolǵandyryp otyr. Árıne qıyn jaǵdaı, biraq bári ózimizge baılanysty. Eger biz jeke bas qaýipsizdigin aldyńǵy orynǵa qoısaq, jaǵdaı ózgeredi. Qarapaıym ǵana maska taǵý, araqashyqtyq saqtaý, kópshilik jınalatyn orynǵa barmaý degen sekildi qıǵadalardy saqtasaq jetip jatyr. Sondaı-aq, árıne vaktsına alý da mańyzdy. Vırýstyń qol-aıaǵy joq ony taratyp, juqtyratyn ózimiz. ıAǵnı saqtansaq, indetke shaldyǵýshylardyń sany azaıady, tıisinshe lokdaýn engizý máselesi de joıylady. Al indettik jaǵdaı údeleýin toqtatpasa, onda qosyshma shara qabyldaýǵa týra keledi. Sebebi qanshama jan aýyryp, odan qaldy mert bolyp jatqanda, shuǵyl ári ońtaıly sheshim qabyldaý talap etiledi», - dedi Tımýr Muratov Instragramdaǵy tikeleı efırde.
Basqarma basshysy indet órshı túsken jaǵdaıda qosymsha gospıtal ashyp, tósek-jaılardyń sanyn arttyryp, sol sııaqty qajetti qural-jabdyqtar men dári-dármekpen qamtylatynyn aıtty.
«Aýrýmen kúreste mamandar máselesin de umytpaǵan jón. Qazirgi ýaqytta elordada 6 myńnan astam dáriger men medbıke indetpen kúresip jatyr. Jalpy qalada 21 myń medıtsına qyzmetkeri eńbek etip jatyr. Jaǵdaı nasharlaı tússe, indetpen kúreske qosymsha mamandar tartatyn bolamyz, onyń ústine koronavırýstan basqa da aýrýdan emdelip jatqan jandar bar», - deıdi ol.
