Elordada 6 kınoteatr qyzmet kórsete bastady
Palata málimetinshe, osy aptada «Asia Park» saýda jáne oıyn-saýyq ortalyǵynda ornalasqan «Arman» kınoteatry, «Arýjan» saýda jáne oıyn-saýyq ortalyǵyndaǵy «ARU Cinema» kınoteatry, «Saryarqa», «Kerýen» jáne «Keruen City» saýda jáne oıyn-saýyq ortalyqtaryndaǵy «Kinopark» kınotearlar jelisi, «TALAN GALLERY» nysanyndaǵy «KERUEN CINEMA» kınoteatry kórermenge óz esikterin aıqara ashty. Sonymen qatar «Movie Room» jumysyn jandandyrdy. Ótken aptada jobaǵa Chaplin kınotetarlar jelisi de qosyldy.
«Kınoteatrlar qajetti tirkeý jáne nusqaýlardan ótip, QR-kod aldy. Endi sanıtar dáriger jazǵan qaýipsizdik sharalaryn saqtap, apta boıy jumys isteýge múmkindik aldy. Mindetti talaptar qatarynda – kelýshilerdi ár eki oryndyq saıyn shahmat tártibinde otyrǵyzý bar, jalpy tolymdylyq 30 paıyzdan aspaýy tıis. Sonymen qatar maska kııý – kelýshiler men personalǵa qoıylǵan mindetti talap. Nysandar ishinde sanıtarlyq óńdeý júrgizilip otyrýy kerek», – dedi Nur-Sultan qalasy óńirlik kásipkerler palatasy dırektorynyń orynbasary Qýanyshbek Muqash.
«Arman» kınoteatrynyń ókili Kamıla Bashpanova ár jańashyldyq sekildi jobany qoldanýda biraz suraq baryn aıtty. Alaıda, kınoteatr qyzmetkerleri kómegimen kelýshiler qosymsha talaptaryn tez ıgerip jatyr.
«Ákimshilerimiz qonaqtarǵa qosymshany júkteýge kómektesip, qosymshaǵa qalaı tirkelip, qoldaný qajettigin túsindirip jatyr. Kınoteatr ishinde qosymshany qoldanýǵa qatysty nusqamalar ilingen. Jalpy alǵanda, adamdar jańashyldyqqa tez beıimdelip, saqtyq sharalaryn qoldanýǵa daıyn», – deıdi ol.
Eske salsaq, Nur-Sultan qalasynda synaq rejıminde Ashyq jobasy 2021 jyldyń 17 qańtarynda iske qosyldy. 2021 jyldyń 26 aqpanynda Bas sanıtar dárigerdiń «Ashyq» mobıldi qosymshasyn Nur-Sultan, Almaty jáne Qaraǵandy qalalaryndaǵy kásipkerlik nysandaryna engizý boıynsha pılottyq is-shara ótkizý týraly» №7 qaýlysy qabyldandy.
Osy qaýly aıasynda «Ashyq» pılottyq jobasy fıtnes-klýbtar, spa-ortalyqtar, saýnalar, basseınder, kompıýter klýbtary jáne boýlıng ortalyqtarynda iske asyryla bastady. Osylaısha, 2020 jyldyń naýryzynan bastap toqtap qalǵan kompıýter klýbtar men boılıng ortalyqtary jumys isteýde.
«Qazirgi kezde joba el aýqymynda taratylýǵa múmkindik aldy. Joǵaryda atalǵan kásipkerlik nysandarynan bólek, jobaǵa kınoteatrlar, qoǵamdyq tamaqtaný nysandary, karaoke jáne banket zaldary, teatrlar, kontsert zaldary qatysa alady. Qazirgi tańda astanada «Ashyq» jobasyna barlyǵy 135 ShOB sýbektisi qatysyp jatyr», – dedi Nur-Sultan qalasy óńirlik kásipkerler palatasynyń dırektory Almat Júnisov
Aıta keteıik, elimizde Ashyq pılottyq jobasyn qoldaný arqyly teatrlar men karaokelerdiń, banket zaldarynyń qaıta jumys isteýine ruqsat berilgen.