Elordada 568 jarnama mátinindegi qateler túzetildi

ASTANA. QazAqparat - Astanada til saıasatyn damytý máselesine erekshe baqylaý júrgiziledi. Elordalyq Tilderdi damytý basqarmasy memlekettik tildiń mártebesin arttyrý, onyń halyq arasynda keńinen qoldanylýyn nasıhattaý boıynsha jumystardy qolǵa aldy, dep habarlady qalalyq ákimdiktiń baspasóz qyzmetinen.

Jyl saıyn memlekettik qyzmetshiler, densaýlyq saqtaý, mádenıet, sport, bilim berý salasynyń mamandary, ulttyq-mádenı ortalyqtardyń ókilderi jáne qala turǵyndary úshin memlekettik tildi úıretý kýrstary uıymdastyrylady. Tegin kýrstarǵa kez kelgen adam qatysa alady. Jyl basynan beri 1500 adam qazaq tili kýrsyn támamdaǵan. Sonyń ishinde 116-y memlekettik qyzmetshi, 1125-i áleýmettik sala mekemeleriniń ókili, 100 adam etnomádenı birlestikter múshesi. Budan bólek, elorda turǵyndary aǵylshyn tilin úırenýde belsendilik tanytýda. Osylaısha, EKSPO-2017 halyqaralyq kórmesine daıyndyq aıasynda Tilderdi damytý basqarmasynda túrli sala qyzmetkerlerine shet tilin úıretý jumystary qolǵa alyndy. Qazirgi kezde shet tilderin úırený kýrsynda 450 qyzmetker oqyp jatyr. Basqarma jumysynyń mańyzdy baǵyttarynyń biri - jarnama mátinderinde belgilengen zańnama normalaryn saqtaý. Basqarma qyzmetkerleri 1790 jarnama jáne vızýaldy aqparat nobaıyna saraptama júrgizdi, 568 jarnamanyń mátinindegi qateler túzetildi. Sonymen qatar, jyl basynan beri jarnama jáne vızýaldy aqparattar mátinderin tekserý úshin 55 reıd uıymdastyryldy. Tekserý barysynda 321 mátinnen qate tabyldy, onyń ishinde 105-i túzetildi. Astana qalasynyń Tilderdi damytý basqarmasy jarnama berýshiler men kásipkerler arasynda túsindirý jumystaryn júrgizip, semınarlar, baıqaýlar ótkizedi, jarnama mátinderin memlekettik tilge aýdarý máselelerin talqylaıdy.