Elordada 550 oqýshydan quralǵan «Astana» qazaq ult aspaptar orkestri óner kórsetedi
ASTANA. QazAqparat - 6 shilde kúni elordanyń Ortalyq alańynda qalanyń 18 jyldyǵyna arnalǵan «Sálem-Astana!» merekelik kontserti ótedi. Bul týraly Astana qalasynyń bilim basqarmasynan habarlady.
Merekelik shara barysynda Almaty, Qostanaı, Kókshetaý, Aqtóbe, Óskemen qalalaryndaǵy qosymsha bilim berý mekemeleriniń oqýshylary án men bıden shashý shashady.
Kontserttik baǵdarlamada 550 oqýshydan quralǵan «Astana» qazaq ult aspaptar orkestri óner kórsetedi. Sonymen qatar 120 qatysýshy jetigen, qylqobyz, qobyz tárizdi qazaqtyń kóne aspaptarymen halyq kompozıtorlarynyń kúılerin oınaıdy. Folklorlyq ansamblder, horeografııalyq ujymdar, hor ujymdary, jeke oryndaýshylar jergilikti turǵyndar men qala meımandaryn óz ónerlerimen tánti etedi.
Árbir qatysýshynyń óneri Led-ekran arqyly kórsetiledi.
Sonymen qatar birýaqytta Astananyń balalar kórkemsýret mektebiniń 25 jas sýretshisi ózderiniń tól týyndylaryn pash etedi.
