Elordada 540 mlrd teńgeniń 100-den astam ınvestıtsııalyq jobasy ýaqytsha toqtaǵan

ASTANA. QazAqparat - Jyl basynan beri elordada quqyq qorǵaý organdary 540 mlrd teńge somasyndaǵy 100-den astam ınvestıtsııalyq jobany toqtatty. Bul týraly Astana qalasy Kásipkerler palatasynyń dırektory Beısen Jolboldıev aıtty, dep habarlaıdy QazAqparat tilshisi.

«Astana qalasynda ınvestıtsııa salasy boıynsha sátsiz iske asyrylǵan jobalar boldy. Jyl basynan beri quqyq qorǵaý organdary jalpy quny 540 mıllıard teńgeni quraıtyn 100-den astam ınvestıtsııalyq jobany ýaqytsha toqtatty. Bul jobalar «ASTANA» áleýmettik-kásipkerlik korporatsııasy arqyly júzege asyrylǵan», - dedi B. Jolboldıev qaladaǵy bıznes ókilderiniń Senat depýtattarymen kezdesýi kezinde.

Bul is boıynsha jobany iske asyrýshylar sotta jeńip shyqqan.

«Sot sheshimi qazan aıynyń sońynda ǵana kúshine enedi. Osy ýaqytqa deıin olar qurylysty bastaı almaıdy. Bul óńirde qarqyndy qurylys kezeńi uzaq emes ekenin eskersek, bul jobalardy júzege asyrý úshin edáýir ýaqyt joǵaltyp alǵanymyzdy atap ótkim keledi» - dep túsindirdi Kásipkerler palatasynyń dırektory

«Qala aýmaǵy keńeıip keledi. Osy oraıda jalpy quny 18 mıllıard teńgeni quraıtyn taǵy úsh «Magným» saýda ortalyǵyn salý jospary boldy. Bul rette bir myń jumys ornyn ashý qarastyrylǵan edi. Endi bul jobalar kelesi jylǵa aýystyrylyp otyr. Atap aıtqanda, bizde osyndaı derekter jıi kezdesedi», - dedi Beısen Jolboldıev.