Elordada 5000-nan astam oqýshy robototehnıka saıysynda kúsh synasyp jatyr
ASTANA. KAZINFORM — Elordadaǵy EXPO halyqaralyq kórme ortalyǵynda Ortalyq Azııadaǵy robototehnıka jáne STEM salasyndaǵy eń aýqymdy oqıǵa — «ALEM TECH FEST 2026» festıvali bastaldy.
11-13 aqpan aralyǵynda ótetin aıtýly sharaǵa Qazaqstan, Qyrǵyzstan, Ózbekstan, Túrikmenstan, Estonııa, Vetnam jáne Gonkongtan kelgen 5000-nan astam mektep oqýshysy qatysyp jatyr.
Festıvaldiń basty oqıǵasy — «Central Asia FIRST Championship» ulttyq kezeńi jáne drondar, Physical AI men ózge de STEM-baǵyttar boıynsha tartysty jarystar.
QR Jasandy ıntellekt jáne tsıfrlyq damý mınıstrligi bul bastamany jastardyń tehnologııaǵa degen qyzyǵýshylyǵyn arttyrý jáne tsıfrlyq daǵdylaryn damytýdyń mańyzdy quraly retinde qoldap otyr.
«USTEM Robotics» robototehnıkany damytý qorynyń» dırektory Asylbek Myrzahmetovtyń aıtýynsha, bıylǵy dodanyń básekelestigi óte joǵary.
— Biz bul chempıonatty altynshy ret ótkizip otyrmyz. 2020 jyly bar bolǵany 20 komandamen bastaǵan edik, búginde 500-den astam komanda jınaldy. Olar osy kezeńge jetý úshin qyrkúıek aıynan bastap 88 irikteý dodasynan ótti. Eń úzdik 25 komanda sáýir aıynda AQSh-tyń Hıýston qalasynda ótetin álemdik chempıonatqa joldama alady. Bıylǵy taqyrybymyz arheologııamen baılanysty. Oqýshylar tek robot jasap qana qoımaı, arheologııadaǵy ózekti máselelerdi zerttep, ǵalymdarmen keńesip, sheshimderin usyna alady, — dedi A. Myrzahmetov.
Bıylǵy festıvalge «Samuryq-Qazyna» qory bas seriktes retinde qoldaý kórsetedi. Bul qadam Memleket basshysynyń 2026 jyldy «Jasandy ıntellekt jyly» dep jarııalaýymen tikeleı baılanysty.
— Bul jarys jastardyń bolashaqqa jasaǵan batyl qadamy. «Samuryq-Qazyna» eń iri jumys berýshi retinde jańa tehnologııalardy óndiriske engizýge múddeli. Gaz hımııasy, avtokólik qurastyrý salalarynda osy jastardyń ıdeıalary erteń iske asýy múmkin. Biz olardyń ónerpazdyǵy men ınjenerlik oılaryn qoldaýdy paryz sanaımyz, — dep atap ótti «Samuryq-Qazyna» qorynyń basqarýshy dırektory Ǵıbrat Aýǵanov.
Jarys alańynda baq synap jatqandardyń biri — Astana qalasyndaǵy № 38 mekteptiń «Venom» komandasynyń múshesi Ersan Aıbol. Ol óz jobasynyń ereksheligimen bólisti.
— Bizdiń jobamyz — artefakt jınaıtyn robot. Ol 2,5 mınýt ishinde alańdaǵy sharlardy jınap, tıisti orynǵa laqtyrýy kerek. Orta Azııa kezeńinen ótkendikten, endigi maqsatymyz — Hıýstonǵa joldama alý. Eń myqty 16 komandanyń qataryna ený úshin barymyzdy salamyz, — deıdi jas ónertapqysh.
Festıval aıasyndaǵy tóreshiler quramynda 200-den astam maman bar. Ár komandanyń jumysyn arheolog, startaper jáne IT mamanynan quralǵan úshtik baǵalaıdy.
Aıta keteıik, Qazaqstan robototehnıkadan tórt dúrken álem chempıony atanyp úlgerdi. Jeneva, Sıngapýr, Afıny jáne Panamada ótken jarystarda otandyq órender kósh bastap keledi.
Buǵan deıin Qytaılyq robot óndirýshiler apparattyq quraldardy jetildirýden ozyq ıntellektýaldy júıelerdi jasaýǵa nazar aýdara bastaǵanyn jazǵan edik.