Elordada 50 jyldyq mereıtoıǵa jınalǵandar meıramhanadan qaıtaryldy
NUR-SULTAN. QazAqparat - Elorda turǵyndary karantın rejıminiń shekteý sharalaryna qaramastan otbasylyq otyrystardy ótkizip jatyr, dep habarlaıdy QazAqparat tilshisi.
Máselen, Nur-Sultan qalalyq Polıtsııa departamentiniń málimetinshe, keshe, 18 qazan kúni saǵat 17.10-da polıtsııa qyzmetkerleri «QUMAN» meıramhanasynda bastalǵan 50 jyldyq mereıtoıdy toqtatqan. Otyrys endi qyzǵan sátte meıramhanaǵa Taýarlar men kórsetiletin qyzmetterdiń sapasy men qaýipsizdigin baqylaý basqarmasy, ákimdik pen Nur-Sultan polıtsııasy ókilderinen turatyn mobıldi top kirip kelip, kóńildi keshtiń odan ary jalǵasýyna múmkindik bermedi.
«Meıramhana ıesi men sharany uıymdastyrýshy shekteýlerdi elemeı, adamdardyń densaýlyǵyna qaýip tóndirdi. Meıramhana ıesi men merekelik otyrysty uımdastyrýshyǵa qatysty jınalǵan materıal QR Ákimshilik quqyq buzýshylyq týraly kodekstiń 424-babymen ákimshilik jaýapkershilikke tartý úshin Taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberildi», - dep atap ótedi vedomstvodan.
Departament aqparatyna qaraǵanda, bir táýliktiń ishinde mobıldi top 132 kásipkerlik sýbektisin tekserip, karantın rejımin buzýdyń 36 faktisin anyqtaǵan.
