Elordada 5 myńnan astam medbıke jumys isteıdi
ASTANA. QazAqparat - Astana qalasy Densaýlyq saqtaý basqarmasynyń málimetinshe, qazirgi tańda elordada 14 emhana, 14 aýrýhana bar jáne ol mekemelerde 5 myńnan astam medbıke jumys isteıdi. Bul týraly Astana qalasynyń resmı saıty habarlady.
Medbıkelerdiń biliktiligin arttyrý maqsatynda Astanada joǵary deńgeıli sheteldik mamandardy shaqyrtý arqyly tájirıbelik kýrstar ótkiziledi. Bul otandyq medıtsına qyzmetkerlerine álemniń biregeı de jańa tehnologııalary boıynsha jumys isteıtin mamandardan tájirıbe alýǵa kómektesedi. Atalmysh sharalardyń barlyǵy elorda halqyna sapaly medıtsınalyq qyzmet kórsetýge baǵyttalǵan.
Eske sala keteıik, búgin - Halyqaralyq medbıke kúni. Ol jyl saıyn ataqty aǵylshyn qaıratkeri Florens Naıtıngeıl týylǵan kúni atalyp ótiledi. Naıtıngeıl Qyrym soǵysy (1853-1856) jyldarynda óz erkimen maıdan shebinde medbıkeler qyzmetin uıymdastyryp, ásker sarbazdaryna sapaly medıtsına qyzmetin kórsetý úshin kúresken bolatyn.
