Elordada 5 myńnan astam búldirshin «Muzbalaq» fılmin tegin tamashalady
ASTANA. QazAqparat - Elordadaǵy «QAZAQSTAN» ortalyq kontsert zalynda «Muzbalaq» anımatsııalyq fılmin 5 600 búldirshin tamashalady, dep habarlaıdy QazAqparat tilshisi.
Eske sala ketsek, astanalyq balalardyń «Muzbalaq» fılmin tegin kóre alatyny keshe habarlanǵan bolatyn.
«Naýryz meıramyn jańa formatta merekeleýdi usynǵan QR Mádenıet jáne sport mınıstri Arystanbek Muhamedıuly atap ótkendeı, Naýryz meıramy balalarǵa arnalýy tıis. Naýryzdy toılaý arqyly biz bar jaqsylyǵymyzdy, sharapatymyzdy búldirshinderge arnaýymyz kerek. Sol kezde ǵana meıramnyń maǵynasy tereńdeı túspek. Osy oraıda, QR Mádenıet jáne sport mınıstrliginiń bastamasymen «Qazaqkontsert» memlekettik kontserttik uıymy Naýryz merekesine oraı kópbalaly jáne áleýmettik turǵydan az qamtylǵan otbasylardan shyqqan balalar, jetimder úıiniń tárbıelenýshileri, múgedek balalar úshin mádenı is-sharalardyń keshenin uıymdastyrdy», - delingen mınıstrliktiń habarlamasynda.
22 jáne 24 naýryz kúnderi «QAZAQSTAN» ortalyq kontsert zalynda «Muzbalaq» mýltfılmi qazaq jáne orys tilderinde kórsetildi. Búrkit pen adamnyń dostyǵy týraly baıandaıtyn bul mýltfılmdi QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ túsirgen. Qazaq anımatsııalyq kıno óneriniń ozyq týyndylaryna jatatyn «Qazaqfılm» AQ mýltfılmi kishkentaı búldirshinderdiń kóńilinen shyqty. Ata-analar da ıgi is-sharanyń uıymdastyrýshylaryna óz alǵystaryn jetkizdi.
«Mýltfılmniń kórsetilimine 5 600 bala, onyń ishinde kópbalaly jáne áleýmettik turǵydan az qamtylǵan otbasy balalary, jetimder úıiniń tárbıelenýshileri, múgedek balalar da qatysty. Naýryz merekesi aıasynda balalarǵa otandyq kıno óneriniń týyndylaryn usyný bastamasy Naýryzdyń jańa turpatta toılanýyna úles qospaq. Uıymdastyrýshylar mereke qarsańynda búldirshinderge arnalǵan osyndaı sapaly ári tálim-tárbıelik máni zor úlken jobalar óziniń jalǵasyn tabatynyn jetkizdi», - dep habarlaıdy mınıstrlikten.
