Elordada 5 mektep paıdalanýǵa beriledi
ASTANA. QazAqparat - Búgin mektepterde kúmis qońyraýdyń kúmbiri estilip, bilim oshaqtary elge esigin aıqara ashady, dep habarlady www.24.kz.
Jańa oqý jylynda elimizde jańa 68 mektep shákirtterdi qushaq jaıa qarsy alady. Astana qalasynda 5 bilim uıasy paıdalanýǵa beriledi. Sonyń biri - №75 kópsalaly gımnazııasy.
Mektep tabaldyryǵyn alǵash attap otyrǵan búldirshinderimiz úshin búgin ómirlerindegi eń mańyzdy sát. Oqý ordasy bilim nárimen sýsyndatyp, túletip ushyrady. Shákirtterdiń ulaǵatty ustazben kezdesýdi asyǵa kútip otyrǵanyn qoldaryndaǵy gúlderi men bal-bul jaınaǵan júzderinen ańǵarýǵa bolady. Al bilim uıasy 1200 oqýshyǵa arnap salynǵan. Kópsalaly gımnazııada jaratylystaný jáne gýmanıtarlyq baǵyttaǵy synyptar bar. Sonymen qatar til kemistigi bar balalar da bilim alady.
Jalpy jańa oqý jylynda elordada 13 myńǵa jýyq bala mektep tabaldyryǵyn attaıdy. Al jalpy Astanada 5 jańa oqý ordasy esigin aıqara ashyp otyr. Zamanaýı talaptarǵa saı oqý ordalarynyń árqaısysy ózindik bilim berý ádisimen erekshelenedi. Biri fızıka-tehnıkalyq baǵyttaǵy vırtýaldy zerthana, mýltımedıalyq synyptarymen jabdyqtalsa, keıbiri ınklıýzıvti bilim berýge maqsattalyp otyr. Sonymen qatar qazan aıynda taǵy da 4700 oryndyq 4 mekteptiń qurylysy aıaqtalady.
