Elordada 444 oqýshy «Altyn belgige» úmitker

ASTANA. KAZINFORM – Elordada 444 oqýshy «Altyn belgige» úmitker. Bul týraly Astana qalalyq bilim basqarmasynyń basshysy Qasymhan Senǵazyev aıtty.

- Bıyl elorda mektepterinde 288 531 oqýshy bilim aldy. Onyń ishinde 11-synypty — 14 274 túlek, al 9-synypty 24 479 oqýshy aıaqtaıdy. 444 oqýshy – «Altyn belgige», 1 087 oqýshy – úzdik attestatqa úmitker. Oqý jyly 2025 jyldyń 23 mamyrynda aıaqtalady. Jyl qorytyndysy retinde elordanyń barlyq mektepterinde «Bilimim – Otanyma!» taqyrybynda biryńǵaı synyp saǵattary ótedi. Atalǵan is-sharalar «Adal azamat» birtutas tárbıe baǵdarlamasynyń qundylyqtaryna negizdelip, oqýshylardyń azamattyq ustanymyn qalyptastyrýǵa baǵyttalady, - dedi ol.

Onyń aıtýynsha, synyp saǵattary aıasynda oqýshylar «Taza Qazaqstan», «Zań jáne tártip», «Adal azamat» baǵyttarynda esse jazady. Sonymen qatar, jazǵy demalys kezeńinde oqýǵa usynylatyn kitaptar tizimi berilip, balalardyń qaýipsizdigin qamtamasyz etý, demalysty aldyn ala josparlaý, qosymsha bilim berý uıymdaryna qatysýdyń mańyzy men eńbek daǵdylaryn qalyptastyrý boıynsha túsindirý jumystary júrgiziledi.

- 11-synyp túlekteri úshin oqý jylynyń aıaqtalýyna arnalǵan saltanatty is-shara 2025 jylǵy 24 mamyr kúni saǵat 10:00-de ótedi, dedi Qasymhan Senǵazyev.

Buǵan deıin elimizdiń orta bilim berý júıesinde kadr tapshylyǵy tolyq joıylǵanyn jazǵan edik.