Elordada 400-ge jýyq avtobýs jetispeıdi
ASTANA. QazAqparat – Elordaǵa 400-ge jýyq avtobýs kerek. Bul týraly Astana qalasynyń kommýnıkatsııalar qyzmetindegi baspasóz máslıhatynda «№1 Avtobýs parki» AQ basqarma tóraǵasy Medet Shaqaev aıtty, dep habarlaıdy QazAqparat tilshisi.
«Astana qalasynyń «№1 Avtobýs parki» elordanyń búkil marshrýttyq jelisiniń shamamen 70 paıyzyn qamtıdy, ıaǵnı 38 qalalyq baǵdarǵa jáne 28 qala mańyndaǵy (100%) baǵdarǵa qyzmet kórsetip keledi. Jyljymaly quram Iveco, Yutong markaly yńǵaıly avtobýstardan turady. Olardyń sany 700-ge jýyqtady. Kásiporynda 1472 adam jumys istep jatyr, onyń 1013 - i júrgizýshi qyzmetinde», - dedi M. Shaqaev.
Jalpy, qalada 6 avtobýs parki qyzmet kórsetip jatyr. Kún saıyn elorda kóshelerinde 850-den astam avtobýs júredi.
«Astanada halyq sany jyl saıyn artyp keledi. Qazirdiń ózinde shamamen qalada 400 avtobýs jetispeıdi. Al bizdiń kásiporynǵa toqtalsaq, 2014-2017 jyldary aralyǵynda avtobýs satyp alynǵan. Sonymen qatar, 100 elektr avtobýsy 2019 jyly jetkizildi. Bul rette keıingi 4 jylda avtobýs parki jańa jolaýshylar kólikterimen jańartylmaǵan. Bizdegi avtobýstardy paıdalaný merzimi ortasha eseppen 6-9 jylǵa jetti. Astanadaǵy jolaýshylar tasymaly erejesi boıynsha avtobýstardyń paıdalaný merzimi 14 jyldan aspaýy kerek», - dedi kásiporyn basshysy.
Aıta keteıik, Astana qalasy ákimdigi №1 Avtobýs parkiniń 100 paıyz aktsıoneri sanalady.
