Elordada 40 myńnan astam oqýshy kezekshi synypta oqydy – Birinshi toqsan qorytyndysy
«Birinshi toqsan qashyqtan oqytý formatynda ótkenin bilesizder. Sonymen birge, ata-analardyń ótinishimen bastaýysh synyp oqýshylary sanıtarlyq-epıdemıologııalyq normalardy saqtaı otyryp, kezekshi synypta oqydy. Qala mektepterinde 1-4 synypqa deıin barlyǵy 3 011 kezekshi synyp ashylyp, onda 40 myńnan astam oqýshy bilim aldy. Al qashyqtan oqytý úshin bilim uıymdary sınhrondy jáne asınhrondy sabaqtar ótkizetin otandyq Online Mektep, Daryn.online ınternet platformalaryn paıdalandy», - dep atap ótti basqarma basshysy qala ákimdiginde ótken brıfıngte.
Onyń aıtýynsha, 79 mektep Online Mektep platformasynda, 32 mektep – Daryn.online platformasynda jumys istegen. 29 mektep – eki platformany da paıdalanǵan.
Odan bólek, qashyqtan oqytý formatyn júzege asyrý úshin Microsoft Teams, Google Meet, EduPage jáne taǵy basqa platformalar paıdalanyldy.
Barlyq pedagogtar men oqýshylar Microsoft Teams tegin akkaýnttarymen qamtamasyz etildi. Jáne mektepterde asınhrondy sabaq ótkizý úshin Kundelik.kz portaly belsendi qoldanylǵan.
«Alǵashqy toqsanda kezikken másele – qashyqtan oqytý formatynda bir synyptaǵy muǵalimderdiń ártúrli platformada jumys isteýi boldy. Bul oqýshylardyń sabaqqa qosylýyn qıyndatty. Osyǵan baılanysty muǵalimderge qosymsha semınarlar ótkizildi jáne másele sheshildi. Endi ár synyp tek bir platformada jumys isteıdi», - dedi Sholpan Qadyrova.
