Elordada 4 sport kesheni salynady
NUR-SULTAN. QazAqparat - Elordanyń turǵyn úı alaptarynda eki dene shynyqtyrý-saýyqtyrý kesheniniń qurylysy bastaldy. Jaqyn arada osyndaı taǵy eki keshen salynady. Olar Nur-Sultan qalasynyń ártúrli aýdanynda ornalasady. Bul týraly QazAqparat qalalyq ákimdiktiń baspasóz qyzmetine silteme jasap habarlaıdy.
Qala ákimi Altaı Kólginov qurylys jumysy barysymen tanysty. Salynatyn dene shynyqtyrý - saýyqtyrý keshenderinde sportpen shuǵyldanatyn bólmelerden bólek poshta bólimshesi, polıtsııa pýnkti, egde jastaǵy adamdardyń qyzyǵýshylyǵy boıynsha bólme, Halyqqa qyzmet kórsetý ortalyǵy, kitaphana jáne taǵy basqalary bolady. Ákimdiktiń Instagram paraqshasynda ǵımarattyń qoldanysqa berý ýaqyty 2021 jyl dep kórsetilgen.
Sondaı-aq, elordadaǵy turǵyn úı alaptarynda jol jóndeý jumystary júrip jatyr. Bıyl 100 shaqyrymǵa sozylatyn 150 kósheniń jolyn jóndeıdi, onyń ishinde 100 kóshe turǵyn úı alaptarynda ornalasqan. Osy baǵyt boıynsha ǵana «Jumyspen qamtý jol kartasy» boıynsha 1,5 myń jumys orny bolady, al jalpy alǵanda atalǵan baǵdarlama boıynsha 15 myń jumys orny bar. Aldymen jumyspen qamtý ortalyǵy arqyly jumyspen qamtıtyn bolady. Sonymen qatar turǵyn úı alaptaryna gaz tartý jelileriniń qurylysy bastaldy. Magıstraldyq gaz qubyryn montajdaý jumystary aıaqtalyp qaldy. Mysaly, Jeleznodorojnyı turǵyn úıine gaz tartý jelileriniń úshten biri tartylyp qoıdy. Osyndaı jumystar Kóktal-1, Kóktal-2 jáne Agroqalashyq turǵyn úı alaptarynda júrgizilip jatyr. Barlyq jumys kestege saı atqarylýda.
Óndiris sektory men turǵyn úı alaptaryna gaz tartý jumystary úsh kezeńnen turady: kelesi jylytý maýsymynda
Kóktal-1, Kóktal-2, Agroqalashyq, Promyshlennyı, Jeleznodorojnyı turǵyn úı alabtaryna gaz tartý josparlanǵan.
