Elordada 4 sáýirden bastap kún jylyna bastaıdy
ASTANA. 29 naýryz. QazAqparat - Astanada sáýir aıynyń ortasynda qar túgeldeı erip, synap baǵany 20 gradýs jylylyqqa deıin kóteriledi.
Bul týraly astana.kz saıtyna «Qazgıdromet» RMK málim etti.
Oǵan deıin kúndiz erip, túnde qatqan aýa temperatýrasy qubylmaly kúıde bolady. Naýryz aıynyń sońy men sáýirdiń basynda elordada Eýropalyq antıtsıklon áseri sýyq jelge ulasady. Batystan soqqan samal ekpini shyǵysqa qaraı respýblıkanyń barlyq aımaqtaryn qamtıdy.
31 naýryz kúni kún sýyq bolyp, qar aralas jańbyr jaýady, sekýndyna 9-14 metr jyldamdyqpen jel soǵady. Sáýirdiń alǵashqy kúnderi aýa temperatýrasy túnde -5-10 gradýs sýyq, al kúndiz 0+5 gradýs jyly bolady.
Sınoptıkterdiń boljaýynsha, 4 sáýirden bastap kún jylyna bastaıdy. Aı ortasyna taman synap baǵanasy +20+25 gradýsqa deıin kóteriledi. Degenmen, sáýir aıy ótpeli kezeń bolǵandyqtan, aýa raıy qubylyp turady. Aıdyń sońǵy on kúninde kún kúrt sýytýy múmkin.
