Elordada kıberalaıaqtyqqa qatysy bar 48 adam ustaldy
ASTANA. KAZINFORM — Astanada polıtsııa qyzmetkerleri kıberalaıaqtyqqa qatysy bar 48 adamdy ustap, jaýaptylyqqa tartty, olardyń ishinde 4 shetel azamaty bar.
Astanada «Anti-fraud» jedel-profılaktıkalyq is-sharasynyń qorytyndylary shyǵaryldy, kıberalaıaqtyqqa qatysty 200-ge jýyq is ashyldy.
Elordada ınternet-alaıaqtyqty qosa alǵanda, aqparattyq tehnologııalar salasyndaǵy quqyq buzýshylyqtarǵa qarsy baǵyttalǵan «Anti-fraud» respýblıkalyq jedel-profılaktıkalyq is-sharasy ótkizildi.
Nátıjesinde polıtsııa qyzmetkerleri kıberalaıaqtyqqa qatysy bar 48 adamdy ustap, jaýaptylyqqa tartty, olardyń ishinde 4 shetel azamaty bar. 200-ge jýyq qylmystyq is ashyldy. Jábirlenýshilerge 26 mıllıon teńgeden astam qarajat qaıtaryldy.
SIM-kartalardy zańsyz tirkegeni úshin 4 adam ustaldy. Olardyń qolynan qylmystyq shemalarda qoldanylýy josparlanǵan 400-den astam SIM-karta tárkilendi.
Sonymen qatar, 4 myńnan astam alaıaqtyq ınternet-resýrs buǵattaldy. «Dropperlerge» qatysty 15 qylmystyq is qozǵaldy. Antıfrod-ortalyqpen birlesken jumys nátıjesinde zańsyz áreketterde paıdalanylǵan 3 myńnan astam bank shoty buǵattaldy.
Aıta ketelik Temirtaýda iri alaıaqtyq áshkerelengen edi.
