Elordada 30 mlrd teńgege 6 azyq-túlik qoımasy salynady
ASTANA. QazAqparat – Polshanyń «Stokson» kompanııasy Astanada 5 mlrd teńgeniń jobasyn iske asyrmaqshy. Astana qalasynyń Investıtsııalar jáne kásipkerlikti damytý basqarmasy basshysynyń orynbasary Maqsat Jańabaev baspasóz konferentsııasynda osyndaı málimet usyndy, dep habarlaıdy QazAqparat tilshisi.
«Elordada daıyn ónim shyǵaryp, qaıta óńdeıtin óndiristik keshen salýǵa baǵyttalǵan 8 ınvestıtsııalyq joba qolǵa alyndy. Birinshi, Polshanyń «Stokson» kompanııasynan sheteldik ınvestıtsııa tartý kózdelip otyr. Jobanyń jalpy quny shamamen 5 mlrd teńge bolady. Ekinshi, zamanaýı ınfraqurylym. Naqtyraq aıtsaq, taýar saqtaıtyn 2 ortalyq, 1 qoıma kesheni, 3 kókónis qoımasyn salýǵa baǵyttalǵan ınvestıtsııalyq jobalar iske asyrylyp jatyr. Jobalardyń jalpy somasy shamamen 30 mlrd teńge bolady», - dedi ol.
Basqarma ókili qalada birneshe jylyjaı salynatynyn atap ótti.
«Úshinshi – jylyjaı keshenderi. Tartylatyn jalpy ınvestıtsııa somasy – 22,7 mlrd teńge bolady. Jyldyń qýaty 14 myń tonna bolatyn 2 jylyjaı kesheni salynyp jatyr.
Tórtinshi – «Akmol food» JShS Aqmola oblysynyń óndirýshilerimen birlesip, qalada 2,6 mlrd teńgege 4 jyl boıy jármeńke júrgizetin ınvestıtsııalyq jobany iske asyryp otyr. Bıyl bul jármeńke aıasyndaǵy taýarlar «egistikten-sórege» qaǵıdaty boıynsha satylady», - dedi Maqsat Jańabaev.
