Elordada 30 eldiń sarapshylary jahandyq yntymaqtastyqtyń jańa qurylymyn talqylamaq

NUR-SULTAN. QazAqparat - Bıyl besinshi ret ótetin «Astana Club» otyrysyna álemniń 30 elinen saıasatkerler, sarapshylar men dıplomattar qatysady. Bul týraly Ortalyq kommýnıkatsııalar qyzmetinde ótken brıfıngte Elbasy qory janyndaǵy Álemdik ekonomıka jáne saıasat ınstıtýtynyń dırektory Erjan Saltybaev aıtty, dep habarlaıdy QazAqparat tilshisi.

«Astana Club» 2015 jyly Elbasynyń bastamasymen qurylǵan. Biz Eýrazııanyń kindiginde ornalasqandyqtan, bul ıdeıany júzege asyrýǵa tolyq quqylymyz dep oılaımyn», - deıdi Erjan Saltybaev.

«Astana Club 2019» sharasynyń basty taqyryby - «Úlken Eýrazııa: jahandyq yntymaqtastyqtyń jańa qurylymy jolynda».

«Halyqaralyq arenada Qazaqstannyń durys kelbetin aıqyndaý baǵytynda atalmysh sharanyń mańyzy zor. Kóptegen memleketter osyndaı jahandyq sıpatqa ıe suhbattardy Qazaqstanda ótkizýge múddeli bolyp otyr, sebebi bizdiń el táýelsizdik alǵaly beıtarap, obektıvti deldal retinde birneshe iri-iri jahandyq bastamalardy alǵa tartty. Osy baǵyttaǵy jumysty ári qaraı jalǵastyrý úshin álemdegi eń bedeldi sarapshylar men mamandardyń basyn qosýdyń mańyzy zor»,- deıdi ÁESI sarapshysy Erlan Mádıev.

«Astana Club» aıasynda ótkiziletin negizgi sharalardyń biri - «Úlken Eýrazııany qurý: seriktestiktiń jańa úlgisi» plenarlyq otyrysyna Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev qatysady.