Elordada 30-dan astam aýla klýby jumys isteıdi
NUR-SULTAN. QazAqparat - Nur-Sultanda 30-dan astam sporttyq jáne shyǵarmashylyq aýla klýby jumys isteıdi. Bul týraly qala ákimdiginiń resmı saıty habarlady.
«2015 jyldan bastap Nur-Sultan qalasynda «Aýla klýbtary« áleýmettik jobasy aıasynda qalanyń 4 aýdanynda 30-dan astam aýla klýbtary jumys isteıdi. Barlyq sektsııalar tegin negizde ótedi. Jas sanaty 7 jastan 29 jasqa deıin. Aýla klýbtarynyń qyzmeti halyqtyń áleýmettik osal toptarynyń balalarynyń bos ýaqytyn qamtamasyz etýge baǵyttalǵan. Búgingi tańda aýla klýbtarynda 3 myńǵa jýyq bala tárbıelenýde. Sporttyq jáne shyǵarmashylyq sabaqtar bar», - dedi «Astana Jastary» JRO aýla klýbtaryn damytý bóliminiń mamany Adelıa Bekarystanova.
Aıta keteıik, aýla klýbtary elordalyq jastardyń bos ýaqytyn tıimdi ótkizý jáne jeke basyn damytý ortalyǵyna aınaldy. Sektsııalarda karate, boks, erkin kúres, qoıan-qoltyq kúres, dzıýdo, ústel tennısi, shahmat, doıby, horeografııa jáne taǵy basqalarmen aınalysýǵa bolady.
«Men «Pro Fit» jobasynyń uıymdastyrýshysymyn. Bul - ult densaýlyǵynyń ıgiligi úshin jáne kópbalaly, sonymen qatar az qamtylǵan otbasylardy qoldaý úshin jumys isteıtin áleýmettik joba. Bizdiń klýb Saryarqa aýdanynda ornalasqan. Ol tolyq jabdyqtalǵan 5 zaldan turady. Oǵan kem degende 300 bala barady«, - dedi «Pro Fit« aýla klýbynyń jetekshisi Almıra Borambaeva.
«Men Mýaı taımen aınalysamyn. Biz bul úıirmege tegin qatysamyz. Maǵan jattyqtyrýshym men jattyǵýlar óte unaıdy», - dedi klýbtyń tárbıelenýshisi Ekaterına Volskaıa.
