Elordada 3 sáýirden birinshi synypqa qujat qabyldaý bastalady
ASTANA. QazAqparat – Birinshi synyp oqýshylarynyń qujatyn qabyldaý 1 sáýirde bastalyp, 1 tamyzǵa deıin jalǵasady. Bul traly Astana qalasy Bilim basqarmasy basshysynyń orynbasary Marjangúl Qaırbaeva málim etti, dep habarlaıdy QazAqparat tilshisi.
«1 sáýirden bastap 1 tamyzǵa deıin jalpy orta bilim beretin mektepterde birinshi synypqa baratyn balalardyń qujattary qabyldanýy tıis. Alaıda bıyl 1 sáýir senbi kúnine dál kelip turǵandyqtan, qujattar 3 sáýirden bastap qabyldanady. Bıylǵy oqý jylynda birinshi synypqa 26 myńǵa jýyq bala keledi dep eseptelip otyr», - dedi M. Qaırbaeva Astana qalasynyń kommýnıkatsııalar qyzmetindegi baspasóz máslıhatynda.
Onyń aıtýynsha, bilim berý uıymdary mektep mańynda turatyn 6 jastaǵy balalardy birinshi synypqa qabyldaýdy qamtamasyz etedi. Daryndy oqýshylarǵa arnalǵan tıisti mektepterden basqalary birinshi synypqa baratyn balalardy eshqandaı emtıhansyz qabyldaıdy. Ár mektepte ata-analarǵa kómektesý maqsatynda birinshi synypqa qabyldaý boıynsha komıssııa quryldy.
«Ata-analar qujattardy «elektrondy úkimet» (www.egov.kz) veb-portaly arqyly nemese mektepterde qaǵaz túrinde de tapsyra alady», - dedi basqarma ókili.
Balalardy birinshi synypqa qabyldaý úshin myna qujattardy tapsyrý kerek: ata-ana ótinishi, balanyń týý týraly kýáliginiń kóshirmesi, densaýlyq jaǵdaıy týraly anyqtama jáne 3h4 kólemindegi 2 fotosýret.
«Bilim berý uıymy ata-anadan tizimde kórsetilmegen basqa qujattardy talap ete almaıdy», - dep naqtylady M. Qaırbaeva.
