Elordada 3 kólik soqtyǵysty
NUR-SULTAN. QazAqparat – Elordada úsh kólik jol apatyna tústi. Bul týraly Nur-Sultan qalalyq polıtsııa departamentinen málim etti, dep habarlaıdy QazAqparat tilshisi.
Vedomstvo málimetinshe, túngi saǵat shamamen 23:35-te «Mersedes» kóligin tizgindegen 20 jastaǵy júrgizýshi Momyshuly dańǵylymen Jumabaev kóshesine qaraı kele jatyp, rýlge ıe bola almaı qalǵan. Sonyń saldarynan jol qozǵalysynyń qarsy betine shyǵyp ketip, «Kıa» men «Lada» kólikterine soǵylǵan.
«Jol-kólik oqıǵasy saldarynan «Kıa» men «Mersedes» kóliginiń júrgizýshileri aýrýhanaǵa túrli dene jaraqatymen jetkizildi. Dárigerler «Mersedes» kóliginiń júrgizýshisin qaraǵannan keıin úıine jiberdi. Atalǵan fakti boıynsha tergeý júrgizilip jatyr. Nur-Sultan qalalyq polıtsııa departamenti júrgizýshilerge jol júrisi erejesin qatań saqtaý qajettigin, joldarǵa barynsha saq bolý kerektigin eskertedi», - delingen departament taratqan aqparatta.
