Elordada 28 myńnan astam múgedek jan turady
NUR-SULTAN. QazAqparat – Nur-Sultan qalasynda qansha múgedek jan bar jáne olardy saýyqtyrýǵa arnalǵan qandaı sharalar júzege asyrylyp jatyr. Osy jáne ózge de suraqtarǵa Nur-Sultan qalalyq Qoǵamdyq densaýlyq saqtaý basqarmasynyń basshysy Tımýr Muratov jaýap berdi, dep habarlaıdy, QazAqparat tilshisi.
«Nur-Sultan qalasynda medıtsınalyq-sanıtarlyq alǵashqy kómek uıymdarynda kúndizgi saýyqtyrý qyzmetin kórsetýge arnalǵan 142 tósek-oryn bar. Qaladaǵy barlyq emhanalarda saýyqtyrý qyzmetin kórsetetin bólim men kabınet jumys isteıdi. Saýyqtyrý qyzmeti kınezoterapevt, fızıoterapevt, ergoreabılıtolog, logoped, psıholog jáne taǵy basqa medıtsınalyq sala mamandarynyń qatysýymen júzege asyrylady. Odan bólek, dárigerlik tekserýden soń qajet jaǵdaıda patsıentke em alýǵa nusqaýlyq beriledi», - dedi T. Muratov qalalyq máslıhattyń jalpy otyrysynda.
Sondaı-aq, basqarma basshysy búginde tańda elordada qansha múgedek jan baryn aıtty.
«2020 jyly Nur-Sultanda 28 553 adam múgedek esebinde tur. Onyń ishinde 6226-sy (22,8%) erekshe kútimdi talap etetin balalar. Qala boıynsha múgedek jandardy saýyqtyrýǵa arnalǵan eresekter úshin 100 tósek-oryn, al balalar úshin 354 tósek-oryn qarastyrylǵan. Sonymen qatar, psıhonevrologııalyq saýyqtyrýdy talap etetinderge arnalǵan 316 tósek-oryn bar. Saýyqtyrý ortalyqtarynda múgedek jandarǵa nevrologııalyq, travmatologııalyq, ortopedııaly, kardıohırýrgııalyq jáne psıhonevrologııalyq kómekter kórsetiledi», - dedi ol.
