Elordada 250 jýyq jetim bala art-terapııadan ótti

ASTANA. QazAqparat - «Astana Arena» stadıonynyń aldyndaǵy alańda «V rıtme drýjby» qaıyrymdylyq sharasy ótti. Psıhologtar men art-terapevtter balalar úıiniń tárbıelenýshilerine arnap kommýnıkatıvtik daǵdylardy damytýǵa jáne óz-ózine degen senimdi arttyrýǵa baǵyttalǵan túrli oıyndar uıymdastyrdy, dep jazady elorda ákimdiginiń resmı saıty.

Aktsııa baǵdarlamasy tájirıbeli mamandarmen ázirlendi, art-terapııanyń túrli ádisteri balalardyń shyǵarmashylyq áleýetin ashýǵa, oılaý qabilettiligi men qajetti áleýmettik mashyqtaryn damytýǵa múmkindik berdi.

«Aktsııa osyndaı aýqymda alǵash ret ótkizilip otyr, sondaı-aq, oıyn, is-qımyl jáne eles-qııal arqyly qarym-qatynas qurýǵa baǵyttalǵan. Bul shara balalardy áleýmettik beıimdeýge jáne óz betinshe ómir súrýge daıyndaýǵa arnalǵan», - deıdi Best for Kids qoǵamdyq qorynyń prezıdenti Saıa Kákim.

Aıta keteıik, sharaǵa astanalyqtar ǵana emes, sonymen qatar Aqmola oblysynyń da balalary qatysty.