Elordada 25 jyl ishinde Konstıtýtsııaǵa engizilgen ózgerister talqylandy
Jıynǵa belgili quqyqtanýshylar, ǵalymdar, memlekettik qyzmetkerler, ÚEU basshylary, belsendi jastar qatysty. Nur-Sultan qalasy ákiminiń orynbasary Baqtııar Máken óz sózinde negizgi zań Qazaqstan halqyna tańdaý quqyǵyn bergendigi ekenin atap ótti.
«Keshe Memleket basshysy atap ótkendeı, Konstıtýtsııa bizdiń táýelsizdigimizdiń berik quqyqtyq negizin jasady. Memlekettiń joǵary qundylyqtary adam, onyń ómiri, quqyqtary men bostandyqtary dep jarııalandy. Bul qujatta eldiń aýmaqtyq tutastyǵy, qoǵamdyq kelisim, saıası turaqtylyq, zańnyń ústemdigi jáne demokratııa prıntsıpteri shoǵyrlandyryldy.
Jańa astananyń damýy búkil Qazaqstandy túbegeıli ózgertti, ony ekonomıkalyq turǵydan qýatty jáne saıası turaqty memleketke, jaýapty jáne bedeldi halyqaralyq serikteske aınaldyrdy.
Qazaqstannyń astanasy bizdiń memleketimizdiń táýelsizdik jyldaryndaǵy áleýmettik-ekonomıkalyq jáne saıası jetistikterin beıneleıdi, eldiń qýatyn jáne ony odan ári damytýdyń joǵary áleýetin kórsetedi», – dep atap ótti Baqtııar Máken.
Onlaın-kezdesý barysynda kórnekti qaıratkerler elimizdiń Konstıtýtsııasynda 25 jyl ishinde jasalǵan negizgi ózgerister týraly aıtty.
«Ata zańdy ázirleý barysynda álemdegi kóp eldiń konstıtýtsııalary zertteldi, biraq bizdiń el Konstıtýtsııasynyń negizi retinde Frantsııa Konstıtýtsııasy alyndy. Frantsııada kúshti prezıdenttik bılik bar, biraq eshkim ol jerde demokratııa joq dep aıta almaıdy. (...) Ata zań dogma emes, onyń mazmuny adekvatty áleýmettik-ekonomıkalyq jáne saıası jaǵdaıǵa sáıkes ózgeredi.
Qoldanystaǵy Konstıtýtsııa qabyldanǵannan beri ótken ýaqyt ishinde oǵan bes ret ózgertýler men tolyqtyrýlar engizildi», – dep túsindirdi QR Konstıtýtsııalyq keńesiniń múshesi Rahmet Muqashev.
QR Prezıdenti janyndaǵy Memlekettik basqarý akademııasy Dıplomatııa ınstıtýtynyń professory, elimizdiń birinshi syrtqy ister mınıstri Tóleýtaı Súleımenov ata zańnyń qazirgi qundylyqtary týraly aıtty.
«Qazir Qazaqstannyń óz zańdy shekarasy bar. Shekarasyz táýelsizdik bolmaıdy. Bizdiń eldiń
terrıtorııasynda ornalasqan ıadrolyq qarýdyń arsenalynan óz erkimen bas tartý memleket
ekonomıkasyna sheteldik ınvestıtsııalardy tartýǵa múmkindik berdi. Óziniń syrtqy saıasatynyń qalyptasýy Qazaqstannyń álemdik arenada jalpyǵa tanylǵan oıynshyǵa aınalýyna múmkindik berdi», – dep atap ótti Tóleýtaı Súleımenov.
Qatysýshylar sonymen birge Konstıtýtsııa barlyq zańdardyń negizin qalaıtyn saıası jáne quqyqtyq júıeniń ózegine aınalǵanyn atap ótti. Ata zańnyń arqasynda qazirgi zamanǵy quqyqtyq memleket qalyptasty. El birligi árqashan basty nazarda bolýy tıis.